నిర్మల్ జిల్లాలోని బాసర ట్రిపుల్ ఐటీ క్యాంపస్‌ను తీవ్ర నీటి ఎద్దడి చుట్టుముట్టింది. వాతావరణంలో చోటుచేసుకున్న ఎల్-నినో ప్రభావం వల్ల వర్షాలు సరిగ్గా కురవకపోవడం, విశ్వవిద్యాలయానికి ప్రధాన నీటి వనరుగా ఉన్న సమీపంలోని చెరువు పూర్తిగా ఎండిపోవడంతో పాటు భూగర్భ జలాలు కూడా అడుగంటడంతో క్యాంపస్‌లో తీవ్ర నీటి కొరత ఏర్పడింది. ఈ ప్రతిష్టాత్మక విద్యాసంస్థలో ప్రస్తుతం ప్రీ యూనివర్సిటీ కోర్టు(PUC) , ఇంజినీరింగ్ చదువుతున్న దాదాపు 9,000 మందికి పైగా విద్యార్థులు ఉన్నారు. విద్యార్థుల హాస్టళ్లు, మెస్ కాంటీన్లు, ల్యాబ్‌లు , ఇతర రోజువారీ అవసరాల కోసం ప్రతిరోజూ కనీసం 25 లక్షల లీటర్ల నీరు అవసరమవుతుంది. అయితే, ప్రస్తుత పరిస్థితుల్లో నిత్యం 15 లక్షల లీటర్ల నీటిని మాత్రమే సరఫరా చేయగలుగుతుండటంతో రోజూ సుమారు 10 లక్షల లీటర్ల నీటి కొరత ఏర్పడుతోంది.
దసరా సెలవుల అనంతరం కళాశాలను తిరిగి ప్రారంభించాలని యోచించినప్పటికీ, ఈ స్థాయిలో నీటి ఎద్దడి ఉంటే విద్యార్థులకు తీవ్ర ఇబ్బందులు ఎదురవుతాయని యాజమాన్యం గుర్తించింది. దీంతో విద్యార్థుల సంక్షేమాన్ని దృష్టిలో ఉంచుకుని దసరా సెలవులను మరికొద్ది రోజులు పొడిగిస్తున్నట్లు విశ్వవిద్యాలయ అధికారులు అధికారికంగా ఉత్తర్వులు జారీ చేశారు. ఈ నీటి సంక్షోభానికి శాశ్వత పరిష్కారం చూపేందుకు యాజమాన్యం యుద్ధప్రాతిపదికన చర్యలు వేగవంతం చేసింది. సమీపంలోని గోదావరి నది నుంచి ప్రత్యేక పైప్‌లైన్లు , పంపింగ్ వ్యవస్థ ద్వారా క్యాంపస్‌కు నీటిని తరలించేందుకు ప్రణాళికలు సిద్ధం చేస్తున్నారు. రోజువారీ నీటి సరఫరాను తిరిగి సాధారణ స్థాయికి (25 లక్షల లీటర్లకు) తీసుకువచ్చిన తర్వాతనే తరగతులను పునఃప్రారంభిస్తామని, మళ్లీ ప్రవేశాల తేదీలను త్వరలోనే వెల్లడిస్తామని అధికారులు స్పష్టం చేశారు.