Virat Kohli Retirement: విరాట్ కోహ్లీ టెస్ట్ క్రికెట్ నుంచి అకస్మాత్తుగా ఎందుకు రిటైర్ అయ్యాడు..? అసలు కథ ఇదే..

భారత స్టార్ క్రికెటర్లు విరాట్ కోహ్లీ, రోహిత్ శర్మ గత ఏడాది వారం రోజుల వ్యవధిలోనే టెస్టు క్రికెట్‌కు వీడ్కోలు పలికిన విషయం తెలిసిందే. ఇంగ్లండ్ పర్యటన కోసం భారత టెస్టు జట్టును ప్రకటించాల్సి ఉండగా.. అంతకుముందే వీరిద్దరూ రిటైర్మెంట్ ప్రకటించి అభిమానులను ఆశ్చర్యపరిచారు. అయితే విరాట్ కోహ్లీ తీసుకున్న నిర్ణయం అప్పట్లో క్రికెట్ వర్గాల్లో పెద్ద చర్చకు దారితీసింది. అతడు మరికొంతకాలం టెస్టు క్రికెట్ ఆడే అవకాశం ఉన్నప్పటికీ ఎందుకు తప్పుకున్నాడనే ప్రశ్నలు తలెత్తాయి. తాజాగా మాజీ క్రికెటర్ వసీం జాఫర్ చేసిన వ్యాఖ్యలు ఈ చర్చకు మరోసారి తెరతీశాయి.

తన యూట్యూబ్ ఛానెల్‌లో మాట్లాడిన వసీం జాఫర్.. కోహ్లీ తనకు ఎదురైన పరిస్థితులతో అసంతృప్తికి గురై రిటైర్మెంట్ నిర్ణయం తీసుకుని ఉండవచ్చని అభిప్రాయపడ్డారు. మాజీ చీఫ్ సెలెక్టర్ అజిత్ అగార్కర్ నేతృత్వంలోని సెలక్షన్ కమిటీ కోహ్లీని సరిగా గౌరవించలేదనే ఆరోపణలు కూడా వినిపిస్తున్నాయని పేర్కొన్నారు. అయితే ఈ విషయంపై కోహ్లీ స్వయంగా స్పందించే వరకు అసలు కారణం ఏమిటో కచ్చితంగా చెప్పలేమని స్పష్టం చేశారు.

కోహ్లీ టెస్టు క్రికెట్‌లో మరిన్ని ఘనతలు సాధించే అవకాశం ఉందని జాఫర్ అభిప్రాయపడ్డారు. టెస్టుల్లో 10 వేల పరుగుల మైలురాయిని చేరుకోవాలనే లక్ష్యం కోహ్లీకి ఉండేదని గతంలో వార్తలు వచ్చాయి. అయితే ఆ లక్ష్యానికి చేరువలో ఉండగానే అతడు ఆటకు వీడ్కోలు పలకడం అభిమానులను నిరాశపరిచింది.

కోహ్లీ తన టెస్టు కెరీర్‌లో 125 మ్యాచ్‌లు ఆడేందుకు కేవలం రెండు మ్యాచ్‌ల దూరంలో ఉన్నాడు. అలాగే 10 వేల పరుగుల మైలురాయిని చేరుకోవడానికి మరో 770 పరుగులు చేయాల్సి ఉంది. భారత్ తరఫున టెస్టుల్లో 10 వేల పరుగులు సాధించిన ఆటగాళ్ల జాబితాలో సునీల్ గవాస్కర్, సచిన్ టెండూల్కర్, రాహుల్ ద్రవిడ్ ఉన్నారు.

ఆస్ట్రేలియాతో జరిగిన బోర్డర్-గవాస్కర్ ట్రోఫీ కోహ్లీకి చివరి టెస్టు సిరీస్‌గా నిలిచింది. ఆ సిరీస్‌లో తొలి మ్యాచ్‌లో సెంచరీ సాధించినప్పటికీ, మొత్తం సిరీస్‌లో 190 పరుగులే చేశాడు. అనంతరం రంజీ ట్రోఫీలోనూ ఆడాడు. అయినప్పటికీ టెస్టులకు వీడ్కోలు పలకడంతో అతడి రిటైర్మెంట్ వెనుక ఏం జరిగిందనే అంశంపై ఇప్పటికీ చర్చ కొనసాగుతోంది.