Govt Job Got: పట్టువదలని విక్రమార్కుడిలా పోరాటం.. 59 ఏళ్ల వయస్సులో ప్రభుత్వ ఉద్యోగం..

ఉత్తరప్రదేశ్‌లోని బాగ్‌పత్ జిల్లా బరౌట్ ప్రాంతానికి చెందిన 59 ఏళ్ల విజయ్ కుమార్ శర్మ సుదీర్ఘ పోరాటం తర్వాత ప్రభుత్వ ఉపాధ్యాయ ఉద్యోగాన్ని సాధించి అందరికీ స్ఫూర్తిగా నిలిచారు. రిటైర్మెంట్‌కు కొద్ది నెలల ముందు, 59 సంవత్సరాల 8 నెలల వయసులో ఆయన సంస్కృత సబ్జెక్టులో ప్రభుత్వ ట్రైన్డ్ గ్రాడ్యుయేట్ టీచర్ (TGT)గా ఎంపికయ్యారు. ఈ విజయం వెనుక ఆయన 27 సంవత్సరాల కఠిన శ్రమ, పట్టుదల ఉన్నాయి.

దాదాపు మూడు దశాబ్దాల పాటు ఆర్థిక ఇబ్బందులు, వ్యక్తిగత సవాళ్లను ఎదుర్కొంటూనే ఆయన తన లక్ష్యాన్ని సాధించారు. కుటుంబ పోషణ కోసం స్థానిక ప్రైవేట్ కోచింగ్ సెంటర్లలో, బరౌట్‌లోని డూన్ పబ్లిక్ స్కూల్‌లో ఉపాధ్యాయుడిగా పనిచేశారు. ఎన్ని అడ్డంకులు ఎదురైనా ప్రభుత్వ ఉపాధ్యాయుడు కావాలనే తన కలను మాత్రం ఆయన ఎప్పటికీ విడిచిపెట్టలేదు. సహచరులు, పాఠశాల యాజమాన్యం ఆయన రోజువారీ క్రమశిక్షణను దగ్గరుండి చూసి ఎంతో అభినందించారు.

స్థానికంగా అందరూ ఆప్యాయంగా “మాస్టర్జీ” అని పిలిచే విజయ్ కుమార్ శర్మ, సంస్కృత వ్యాకరణం, శ్లోకాలను విద్యార్థులకు ఎంతో సులభంగా, ఆటపాటలతో కూడిన విద్యాబోధన ద్వారా అర్థమయ్యేలా చెబుతారు. విఫలమయ్యామని నిరుత్సాహపడకుండా, ప్రతి ఓటమినీ విజయానికి మెట్టుగా మలచుకోవాలని ఆయన తన విద్యార్థులకు నిత్యం చెబుతుంటారు. తన జీవితం ద్వారా పట్టుదల ఉంటే ఏ వయసులోనైనా విజయం సాధించవచ్చని ఆయన నిరూపించారు.

సెప్టెంబర్ 22, 2026న లక్నోలోని ఇందిరా గాంధీ ప్రతిష్ఠాన్‌లో నిర్వహించిన కార్యక్రమంలో ఉత్తరప్రదేశ్ ముఖ్యమంత్రి యోగి ఆదిత్యనాథ్ స్వయంగా విజయ్ కుమార్ శర్మకు నియామక పత్రాన్ని అందజేశారు. రాష్ట్రవ్యాప్తంగా ప్రభుత్వ సహాయక మాధ్యమిక పాఠశాలల్లో ఎంపికైన 3,567 మంది అభ్యర్థులకు ఈ వేడుకలో నియామక ఉత్తర్వులు పంపిణీ చేశారు. దాదాపు 60 ఏళ్ల వయసులో ముఖ్యమంత్రి చేతుల మీదుగా ఆయన నియామక పత్రం అందుకుంటున్న సమయంలో అక్కడ ఉన్నవారంతా కరతాళధ్వనులతో అభినందించారు. ఆయన సాధించిన ఈ చారిత్రాత్మక విజయం నిరుద్యోగుల్లో ఎంతో మందికి నూతన స్ఫూర్తిని ఇస్తోంది.