బిడ్డ కోసం చిరుతతో పోరాటం.. తల్లి ప్రేమ ముందు తోకముడిచిన క్రూరమృగం..

తన పిల్లల కోసం ఎంతకైనా తెగిస్తుంది తల్లి.. చివరకు తన ప్రాణాలను సైతం పనంగా పెట్టడానికి కూడా వెనుకడుగు వేయదు.. ఇలాంటి ఘటనలో ఎన్నో చూశాం.. తాజాగా, తన కుమారుడిని ఎత్తుకెళ్తున్న చిరుతను వెంటాడి పోరాటానికి దిగింది ఓ తల్లి.. ఆ బాలుడిని వదిలిపెట్టి.. తనపైకి చిరుత దూసుకొచ్చినా ఏ మాత్రం ధైర్యాన్ని కోల్పోకుండా సమరమే చేసింది.. చివరకు తన కుమారుడి కోసం తల్లి చేసిన పోరాటం ముందు క్రూర మృగం తోకముడిచి వెళ్లిపోయింది..

Read Also: ఆ ఎమ్మెల్యేని లేపేస్తే రూ.కోటి ఇస్తా.. డీల్‌ వీడియో లీక్..!

మధ్యప్రదేశ్‌లో జరిగిన ఈ ఘటనకు సంబంధించిన పూర్తి వివరాల్లోకి వెళ్తే.. సీధీ జిల్లా సంజయ్‌గాంధీ నేషనల్‌ పార్క్‌ సమీపంలోని బడీ ఝిరియా గ్రామంలో గిరిజన మహిళ కిరణ్‌కు నలుగురు పిల్లలు ఉన్నారు.. రాత్రి సమయంలో ఒడిలో ఓ పసి బిడ్డకు పాలిస్తూ చపాతీలు చేస్తుంది ఆమె.. మిగతా ముగ్గురు పిల్లలు అక్కడే ఆడుకుంటున్నారు.. అయితే, అక్కడికి వచ్చిన చిరుత ఓ బాలుడిని నోట కరుచుకొని వెళ్లిపోయింది.. ఊహించని ఘటనతో షాక్‌ తిన్న ఆ తల్లి.. వెంటనే తేరుకుని.. ఒడిలోని పాపను పెద్ద పిల్లలకు అప్పగించి చిరతను వెంబడించింది.. తన కుమారుడి కేకలు వింటూ ఆ వెనుకే ఓ కర్రపట్టుకుని పరుగులు పెట్టింది.. ముళ్లు, పదునైన రాళ్లు గుచ్చుకుంటున్నా లెక్కచేయకుండా చిరతను అనుసరించింది.. దీంతో.. ఒక్కసారిగా వెనక్కి తిరిగిన చిరుత… బాలుడిని వదిలేసి, తల్లిపై దూకింది.. అయినా ఏ మాత్రం వెరవకుండా తెగించి పోరాటం చేసింది ఆ మహిళ.. చివరకు చిరుతను పరుగులు పెట్టించింది.. ఆ తర్వాత రక్తమోడుతున్న బిడ్డను భుజానికి ఎత్తుకొని.. సమీపంలోని ఆస్పత్రిలో చేర్చింది.. ప్రస్తుతం ఆ పసివాడు క్షేమంగా ఉన్నాడు.. ఈ ఘటనపై ఆమె మాట్లాడుతూ.. ఒక్క క్షణం ఆలస్యమైనా.. ఆ చిరుత నా బిడ్డను చీల్చేసేది అంటూ కన్నీరుపెట్టుకుంది.. మొత్తంగా తన బిడ్డపై మమకారంతో.. తెగించి పోరాటం చేసిన ఆ తల్లి ప్రేమ ముందు చిరుత సైతం తోకముడిచింది.