Rahul Gandhi: ‘‘ఎవరూ తప్పించుకోలేరు’’.. మోదీ, షా, భగవత్, జ్ఞానేష్ కుమార్‌పై రాహుల్ గాంధీ తీవ్ర ఆరోపణలు

Rahul Gandhi: కేంద్ర ఎన్నికల ప్రధాన కమిషనర్ జ్ఞానేష్ కుమార్‌ రాజీనాయా చేయాలని ఈరోజు( మంగళవారం) కాంగ్రెస్, ప్రతిపక్ష నేతలు ఎన్నికల ప్రధాన కార్యాయాన్ని ముట్టడించే ప్రయత్నం చేశాయి. ఈ నేపథ్యంలో ఢిల్లీలో పోలీసులకు, ప్రతిపక్ష నేతలు, కార్యకర్తలకు మధ్య తీవ్ర ఉద్రిక్తత ఏర్పడింది. ఈ నిరసనల్లో పాల్గొన్న లోక్‌సభలో ప్రతిపక్ష నేత, కాంగ్రెస్ ఎంపీ రాహుల్ గాంధీ సంచలన వ్యాఖ్యలు చేశారు. ఈసీని విమర్శిస్తూ కేంద్రాన్ని టార్గెట్ చేశారు. ప్రధాని నరేంద్రమోడీ, కేంద్ర హోంమంత్రి అమిత్ షా, ఆర్ఎస్ఎస్ చీఫ్ మోహన్ భగవత్, సీఈసీ జ్ఞానేష్ కుమార్‌పై తీవ్ర ఆరోపణలు చేశారు. వీరంతా కలిసి ప్రజాస్వామ్యాన్ని నాశనం చేస్తున్నారని ఆయన ఆరోపించారు.

‘‘ మన దేశానికి జరిగింది దేశద్రోహం. ఎవరూ తప్పించుకోలేరు’’ అని రాహుల్ గాంధీ వ్యాఖ్యానించారు. ఓట్ల చోరీ ద్వారా మోడీ, అమిత్ షా, మోహన్ భగవత్ దేశాన్ని హైజాక్ చేశారని ఆరోపించారు. ఈ ప్రక్రియకు జ్ఞానేష్ కుమార్ సహకరించారని విమర్శించారు. బీజేపీని ఎదుర్కోవడమే తమ లక్ష్యం కాదని, దేశంలో ప్రజాస్వామ్యాన్ని కాపాడేందుకు పోరాడుతున్నామని అన్నారు. వారిని ఓడిస్తామంటూ బీజేపీకి వార్నింగ్ ఇచ్చారు.

ఓటర్ల జాబితాలో అక్రమాలు జరిగాయని, స్పెషల్ ఇంటెన్సివ్ రివిజన్(ఎస్ఐఆర్) ద్వారా ఓటర్లను తొలగించారని కాంగ్రెస్ ఆరోపిస్తోంది. ఈసీ కార్యాలయానికి కాంగ్రెస్ , ఇతర ప్రతిపక్షాలు ర్యాలీగా వెళ్లి ముట్టడించే ప్రయత్నం చేశాయి. ఆకాశవాణి భవన్ సమీపంలో రాహుల్ గాంధీ, ప్రియాంకా గాంధీలను పోలీసులు అడ్డుకున్నారు. దీంతో వీరిద్దరూ రోడ్డుపైనే కూర్చుని నిరసన తెలిపారు. ప్రతిపక్ష ఎంపీలు సీఈసీని కలవాలని అనుకుంటున్నారని, కానీ పోలీసులు ఇక్కడే నిలిపేశారని, కానీ జ్ఞానేష్ కుమార్ భయపడుతున్నారని రాహుల్ గాంధీ అన్నారు. సమాజ్‌వాదీ పార్టీ అధినేత అఖిలేష్ యాదవ్, టీఎంసీ ఎంపీలు అభిషేక్ బెనర్జీ, డెరిక్ ఓబ్రెయిన్ సహా పలువురు ప్రతిపక్ష నేతలను పోలీసులు అదుపులోకి తీసుకున్నారు.