Rahul Gandhi: ‘నా లక్ష్యం 100 ఎఫ్‌ఐఆర్‌లు’.. ఈసీకి వ్యతిరేకంగా ఆందోళన కొనసాగుతుందన్న రాహుల్‌గాంధీ

ఎన్నికల సంఘానికి వ్యతిరేకంగా ప్రతిపక్షాల ఆందోళన కొనసాగుతోంది. కేంద్ర ఎన్నికల సంఘం, ప్రత్యేక సమగ్ర ఓటర్ల జాబితా సవరణ (SIR) ప్రక్రియపై నిరసన వ్యక్తం చేస్తున్న ప్రతిపక్ష ఎంపీలు బుధవారం ఢిల్లీలోని జంతర్ మంతర్‌కు వెళ్లనున్నట్లు కాంగ్రెస్ అగ్రనేత రాహుల్ గాంధీ తెలిపారు. లోక్‌సభ, రాజ్యసభకు చెందిన సుమారు 300 మంది ఎంపీలు మంగళవారం ప్రధాన ఎన్నికల కమిషనర్ (CEC) జ్ఞానేశ్ కుమార్‌ను కలిసేందుకు ప్రయత్నించినప్పటికీ.. ఆయనను కలిసేందుకు అవకాశం ఇవ్వలేదని రాహుల్ గాంధీ ఆరోపించారు. జ్ఞానేశ్ కుమార్‌ రాజీనామా చేయాలంటూ విపక్షాలు డిమాండ్ చేస్తున్నాయి.

మంగళవారం నిరసనకు నిర్ణయించిన ప్రదేశానికి వెళ్లకుండా ఢిల్లీ పోలీసులు తమను అడ్డుకున్నారని రాహుల్ గాంధీ తెలిపారు. అక్కడ నిరసన చేపట్టేందుకు అనుమతి లేదని పోలీసులు చెప్పినట్లు పేర్కొన్నారు. ‘‘నిన్న చెప్పినట్లుగానే.. లోక్‌సభ, రాజ్యసభకు చెందిన సుమారు 300 మంది ఎంపీలు CECని కలవాలని అనుకున్నారు. కానీ ఆయన మమ్మల్ని కలవలేదు. ఢిల్లీ పోలీసులు మమ్మల్ని అడ్డుకున్నారు. అక్కడ నిరసన చేయడానికి వీల్లేదని నిన్న చెప్పారు’’ అని రాహుల్ గాంధీ తెలిపారు. దీంతో అధికారికంగా నిరసనలకు కేటాయించిన జంతర్ మంతర్‌కు వెళ్లి అక్కడే ఆందోళన చేపట్టాలని నిర్ణయించినట్లు చెప్పారు.

‘100 FIRలు నమోదు చేయండి’

తనపై కేసులు నమోదవుతున్న అంశంపైనా రాహుల్ గాంధీ స్పందించారు. తనపై 100 ఎఫ్‌ఐఆర్‌లు నమోదైనా తనకు అభ్యంతరం లేదని వ్యాఖ్యానించారు. ‘‘నాపై 100 ఎఫ్‌ఐఆర్‌లు నమోదు చేయండి. ప్రతి ఎఫ్‌ఐఆర్ నాకు ఒక పతకం లాంటిదే’’ అని అన్నారు. ఇప్పటికే తనపై 45 ఎఫ్‌ఐఆర్‌లు నమోదయ్యాయని పేర్కొన్నారు.

 ఖర్గే విందు

ఇదిలా ఉండగా.. కాంగ్రెస్ అధ్యక్షుడు మల్లికార్జున ఖర్గే బుధవారం ఢిల్లీలోని కనాట్ ప్లేస్‌లో ఉన్న సాగర్ రత్న రెస్టారెంట్‌లో కాంగ్రెస్ ఎంపీలు, ఇండియా కూటమి భాగస్వామ్య పార్టీల నేతలకు విందు ఏర్పాటు చేశారు. ఈ సమావేశం అనంతరం రాహుల్ గాంధీ ఎన్నికల సంఘంపై ప్రతిపక్షాల ఆందోళనను కొనసాగించనున్నట్లు తెలిపారు. SIR ప్రక్రియపై తమ అభ్యంతరాలను ప్రజల దృష్టికి తీసుకెళ్లడమే తమ లక్ష్యమని పేర్కొన్నారు.