Siya Goyal: పూణే లోహగడ్ కోట హ*త్య కేసు.. మీడియాకు మిడిల్ ఫింగర్ చూపించిన సియా గోయల్.. వీడియో వైరల్

మహారాష్ట్రలో సంచలనం సృష్టించిన పూణే లోహగడ్ కోట హత్య కేసులో ప్రధాన నిందితురాలు సియా గోయల్ మరోసారి వివాదంలో నిలిచింది. తన కాబోయే భర్త కేతన్ అగర్వాల్ హత్య కేసులో అరెస్టైన సియా, పోలీసుల ఎస్కార్ట్‌లో బయటకు వస్తున్న సమయంలో మీడియా ప్రతినిధుల వైపు మధ్యవేలు (Middle Finger) చూపించింది. ఈ ఘటనకు సంబంధించిన వీడియో సోషల్ మీడియాలో వైరల్‌గా మారింది.

మీడియా ముందు అభ్యంతరకర ప్రవర్తన

పోలీసులు దర్యాప్తు నిమిత్తం సియాను పూణేలోని ఆమె నివాసానికి తీసుకెళ్లారు. అక్కడి నుంచి తిరిగి బయటకు వస్తున్న సమయంలో ఆమె నల్లటి టీ-షర్ట్ ధరించి, ముఖాన్ని స్కార్ఫ్‌తో కప్పుకుంది. మీడియా ప్రతినిధులు ఆమె దృశ్యాలను చిత్రీకరిస్తుండగా, సియా వారివైపు చూస్తూ మధ్యవేలు చూపించింది. ఈ 17 సెకన్ల వీడియో సోషల్ మీడియాలో విస్తృతంగా చక్కర్లు కొడుతోంది.

సోషల్ మీడియాలో తీవ్ర విమర్శలు

వీడియో వైరల్ కావడంతో నెటిజన్లు సియాపై తీవ్ర విమర్శలు గుప్పిస్తున్నారు. హత్య కేసులో నిందితురాలిగా ఉన్నప్పటికీ ఏమాత్రం పశ్చాత్తాపం కనిపించడం లేదని, ఆమె ప్రవర్తన అహంకారాన్ని ప్రతిబింబిస్తోందని పలువురు వ్యాఖ్యానిస్తున్నారు.

కేతన్ అగర్వాల్ హత్య కేసు ఏంటి?

పోలీసుల దర్యాప్తు ప్రకారం, జూన్ 18న పూణే సమీపంలోని లోహగడ్ కోట వద్ద సియా గోయల్, తన ప్రియుడు చేతన్ చౌదరితో కలిసి కేతన్ అగర్వాల్‌ను లోయలోకి తోసి హత్య చేసినట్లు ఆరోపణలు ఉన్నాయి.

మొదట కేతన్ ప్రమాదవశాత్తు జారి పడిపోయాడని సియా పోలీసులకు చెప్పింది. దీంతో పోలీసులు ప్రారంభంలో ప్రమాదవశాత్తు మృతి కేసుగా నమోదు చేశారు. అయితే, కేతన్ మరణించిన తర్వాత కూడా సియా ప్రవర్తనలో ఎలాంటి బాధ లేదా ఆందోళన కనిపించకపోవడంతో పోలీసులకు అనుమానం వచ్చింది. దీంతో లోతైన దర్యాప్తు చేపట్టగా అసలు విషయం వెలుగులోకి వచ్చినట్లు పోలీసులు తెలిపారు.

పెళ్లికి ముందే హత్యకు కుట్ర

సియా గోయల్, కేతన్ అగర్వాల్ కుటుంబ సభ్యులు వీరి వివాహాన్ని ఇప్పటికే ఖరారు చేశారు. నవంబర్‌లో ఘనంగా పెళ్లి జరగాల్సి ఉంది. అయితే, సియా తన ప్రియుడు చేతన్ చౌదరితో ప్రేమాయణం కొనసాగిస్తోంది. కేతన్ తమ సంబంధానికి అడ్డుగా ఉన్నాడని భావించిన ఇద్దరూ కలిసి హత్యకు కుట్ర పన్నినట్లు పోలీసులు వెల్లడించారు.

తొలి ప్రయత్నం విఫలం.. రెండోసారి హత్య

దర్యాప్తులో వెల్లడైన వివరాల ప్రకారం, జూన్ 14న సియా కేతన్‌ను లోహగడ్ కోటకు తీసుకెళ్లి లోయలోకి తోసే ప్రయత్నం చేసింది. అయితే కేతన్ అక్కడి పొదలను పట్టుకుని ప్రాణాలతో బయటపడ్డాడు.

ఆ సమయంలో అనుమానం రాకుండా ఉండేందుకు “పాము కనిపించింది” అంటూ అరుస్తూ, తర్వాత అతన్ని కౌగిలించుకుని పరిస్థితిని సాధారణంగా మార్చినట్లు పోలీసులు తెలిపారు. ఆ తర్వాత మళ్లీ కోటకు రావాలని కేతన్‌ను ఒప్పించిన సియా, ఈసారి తన ప్రియుడు చేతన్‌ను కూడా అక్కడికి పిలిపించింది. అనంతరం ఇద్దరూ కలిసి కేతన్‌ను వెనుక నుంచి తోసేయడంతో అతడు లోయలో పడి మృతి చెందినట్లు పోలీసులు ఆరోపిస్తున్నారు.

నేడు కోర్టులో హాజరు

ఈ కేసులో అరెస్టైన సియా గోయల్, చేతన్ చౌదరిని పోలీసులు నేడు వడగావ్ కోర్టులో హాజరుపరచనున్నారు. మరింత విచారణ కోసం పోలీసు కస్టడీ కోరనున్నట్లు సమాచారం. మరోవైపు, నిందితుల తరఫు న్యాయవాదులు జ్యుడీషియల్ కస్టడీ ఇవ్వాలని కోర్టును కోరనున్నట్లు తెలుస్తోంది. ఈ హత్య కేసు, అలాగే నిందితురాలి తాజా ప్రవర్తన దేశవ్యాప్తంగా తీవ్ర చర్చకు దారితీసింది. పోలీసులు కేసుకు సంబంధించిన అన్ని కోణాల్లో దర్యాప్తును కొనసాగిస్తున్నారు.

Pune, Maharashtra: Siya Goyal, accused in the Ketan Agarwal murder case, was taken by Pune Rural Police to her Market Yard residence for investigation. After the investigation was completed, while leaving the house, Siya Goyal allegedly made obscene gestures and showed the middle… pic.twitter.com/mHnQKlfRrq

— IANS (@ians_india) July 2, 2026