దేశవ్యాప్తంగా నొప్పి నివారణ, నరాల సంబంధిత సమస్యల చికిత్సలో ఉపయోగించే ప్రెగాబాలిన్ మందు దుర్వినియోగం పెరుగుతుండటంపై కేంద్ర ఆరోగ్య శాఖ ఆందోళన వ్యక్తం చేసింది. యువతలో ఈ ఔషధాన్ని మత్తు కోసం వినియోగిస్తున్న ఘటనలు పెరుగుతున్న నేపథ్యంలో, ప్రెగాబాలిన్ అమ్మకాలపై కఠిన నియంత్రణలు అమలు చేయాలని రాష్ట్ర ప్రభుత్వాలు, ఔషధ నియంత్రణ సంస్థలకు కేంద్ర ఆరోగ్య శాఖ సూచనలు జారీ చేసింది. ప్రెగాబాలిన్ (Pregabalin) అనే ఔషధాన్ని డ్రగ్స్ అండ్ కాస్మెటిక్స్ రూల్స్, 1945లోని షెడ్యూల్ H1 కిందకు చేర్చింది. ఈ నిర్ణయం ద్వారా ఔషధం దుర్వినియోగం, ముఖ్యంగా యువతలో పెరుగుతున్న దుర్వినియోగాన్ని అరికట్టడం లక్ష్యం.
ఏమిటి ఈ మార్పు?
ఇప్పటి వరకు ప్రెగాబాలిన్ షెడ్యూల్ H కింద ఉండేది.
ఇకపై షెడ్యూల్ H1 కిందకు వస్తుంది. దీంతో డాక్టర్ ప్రిస్క్రిప్షన్ (చీటీ) లేకుండా ఎక్కడా అమ్మకూడదు.
ఫార్మసీలు ప్రతి అమ్మకానికి సంబంధించిన రికార్డులు నిర్వహించాలి.
ప్యాకేజింగ్పై ఎరుపు రంగు “Rx” సింబల్తో పాటు “Schedule H1 Drug” హెచ్చరిక ఉండాలి.
ఎందుకు ఈ చర్య?
ప్రెగాబాలిన్ సాధారణంగా దీర్ఘకాలిక నొప్పి (chronic pain), నరాల నొప్పులు (neuropathies), ఫైబ్రోమయాల్జియా, మూర్ఛ వ్యాధి వంటి సమస్యల చికిత్సకు వాడతారు. కానీ ఇటీవలి కాలంలో కొన్ని రాష్ట్రాల నుంచి ఈ మందును మత్తు (sedative/euphoric effects) కోసం దుర్వినియోగం చేస్తున్నారని ఫిర్యాదులు వచ్చాయి. ముఖ్యంగా యువతలో ఈ ట్రెండ్ పెరిగింది.