Designer Pen Smuggling: ఒక్కో పెన్ను రూ.50 వేలు.. కస్టమ్స్ సైతం నివ్వెరపోయే స్మగ్లింగ్!

అహ్మదాబాద్‌లోని సర్దార్ వల్లభభాయ్ పటేల్ అంతర్జాతీయ విమానాశ్రయంలో కస్టమ్స్ శాఖ అరుదైన స్మగ్లింగ్ కేసును ఛేదించింది. జపాన్ నుంచి వియత్నాం మీదుగా అహ్మదాబాద్‌కు వచ్చిన ఓ ప్రయాణికుడి నుంచి 61 ప్రీమియం డిజైనర్ ఇంక్ పెన్నులు స్వాధీనం చేసుకుంది. ఈ పెన్నుల మొత్తం విలువ సుమారు రూ.25 లక్షల నుంచి రూ.30 లక్షల వరకు ఉంటుందని అంచనా వేస్తున్నారు.
ఏప్రిల్ 26, 2026న వియట్‌జెట్ విమానం VJ 1805లో హో చి మిన్ సిటీ మీదుగా జపాన్ నుండి అహ్మదాబాద్‌కు వచ్చిన పురుష ప్రయాణికుడు అనుమానాస్పదంగా ప్రవర్తించాడు. బ్యాగేజ్ స్కానింగ్ సమయంలో కస్టమ్స్ అధికారులకు కొన్ని అనుమానాస్పద ఫోటోలు కనిపించాయి. దీంతో అతనిని ఆపి, సామానును క్షుణ్ణంగా తనిఖీ చేశారు.

సోదా సమయంలో లగేజీలో 61 అధిక విలువ గల డిజైనర్ పెన్నులు దాచి పెట్టినట్లు బయటపడ్డాయి. కస్టమ్స్ సుంకాలను ఎగవేసేందుకు ఈ పెన్నులను ఉద్దేశపూర్వకంగా దాచిపెట్టినట్లు విచారణలో తెలిసింది. ఒక్క పెన్ను ధర ఐఫోన్‌కు సమానం. ప్రతి పెన్ను అంచనా విలువ రూ. 40,000 నుంచి రూ.50,000 వరకు ఉంది. అంటే, ఒక్క పెన్ను ధర ఒక హై-ఎండ్ స్మార్ట్‌ఫోన్ ధరతో సమానంగా ఉండవచ్చు. ఈ పెన్నులు కలెక్టర్స్ ఐటెమ్స్‌గా ప్రసిద్ధి చెందిన లగ్జరీ బ్రాండ్లకు చెందినవి.

ఈ వస్తువులన్నింటినీ 1962 కస్టమ్స్ చట్టం ప్రకారం స్వాధీనం చేసుకున్నారు.అయితే, పెన్నుల ఖచ్చితమైన విలువను ఇంకా అధికారికంగా నిర్ధారించలేదు. చార్టర్డ్ ఇంజనీర్ (CA) ద్వారా మూల్యాంకనం జరుగుతోంది. ప్రయాణికుడిని ప్రశ్నిస్తున్నారు. తదుపరి దర్యాప్తు కొనసాగుతోంది. ఈ ఘటన కస్టమ్స్ శాఖను కూడా నివ్వెరపోయేలా చేసింది. ఎందుకంటే ఇంత ఎక్కువ సంఖ్యలో ఖరీదైన డిజైనర్ పెన్నులను ఒక్కసారిగా స్మగ్ల్ చేసే ప్రయత్నం అరుదు.