Ketan Agrawal Case: కేతన్ అగర్వాల్ హత్య కేసులో బిగ్ ట్విస్ట్.. చేతన్, సియాల తర్వాత మరొకరి అరెస్ట్..

Ketan Agrawal Case: పూణేలో జూన్ 18న లోహగఢ్ కోటపై నుంచి కేతన్ అగర్వాల్‌ను కాబోయే భార్య సియా గోయల్ తోసి చంపింది. ఈ హత్య దేశవ్యాప్తంగా సంచలనంగా మారిన సంగతి తెలిసిందే. అయితే, ఈ కేసులో బిట్ ట్విస్ట్ చోటుచేసుకుంది. ఇప్పటికే సియా, ఆమె లవర్ చేతన్ చౌదరిలనను పోలీసులు అరెస్ట్ చేశారు. ఇప్పుడు మరో అనుమానితుడిని పోలీసులు అరెస్ట్ చేశారు. అతడికి ఈ కేసులో ప్రమేయం ఉందనే ఆరోపణలు వినిపస్తున్నాయి.

పోలీసులు వర్గాలు చెబుతున్న దాని ప్రకారం.. తాజాగా అరెస్ట్ అయిన నిందితుడు చేతన్ చౌదరితో చదువుకున్న రితేష్ హింగే. కేతన్ హత్య ప్లాన్ గురించి ఇతడికి ముందే తెలుసని సమాచారం. చేతన్, సియా హత్యకు ప్లాన్, అమలు చేసే పద్ధతి గురించి రితేష్‌తో చర్చించినట్లు తెలుస్తోంది. సియా, చేతన్‌లు పలు సందర్భాల్లో రితేష్‌ను లోహగఢ్‌కు రావాలని కోరినట్లు సమాచారం. అతను వారితో వెళ్లడానికి నిరాకరించినప్పటికీ, హత్య గురించి ముందే తెలుసని పోలీసులు అనుమానిస్తున్నారు. చేతన్ ఫోన్ నుంచి లభించిన ఆధారాలతోనే రితేష్‌ను ట్రేస్ చేసినట్లు పోలీసులు చెబుతున్నారు.

నిందితుడు బీడ్ జిల్లాకు చెందిన వాడని, బలేవాడిలో ఒక ప్రైవేట్ కంపెనీలో పనిచేస్తున్నాడని సమాచారం. మే నెల చివరి వారంలో చేతన్‌తో టచ్‌లో ఉన్నట్లు సమాచారం. ఈ కుట్ర గురించి అతనికి ముందే తెలుసు, నేరంలో అతడి పాత్ర ఏమిటి అనే విషయాలను పోలీసులు నిర్ధారించేందుకు ప్రయత్నిస్తున్నారు. జూన్ 18న లోహగఢ్ కోటలో ఏం జరిగింది, దీని గురించి ఎవరెవరకి తెలుసు అనే ప్రశ్నలకు సమాధానాలు రాబట్టే ప్రయత్నం చేస్తున్నారు.