ఢిల్లీలోని జంతర్ మంతర్‌ను నిరసన ప్రదేశాల జాబితా నుంచి కేంద్ర ప్రభుత్వం తొలగించిన మరుసటి రోజే కాక్రోచ్ జనతా పార్టీ (CJP) కార్యకర్తలు ఆందోళనకు దిగారు. పార్టీ నేతలు ఆశుతోష్ రంకా, సౌరవ్ దాస్ నేతృత్వంలో మంగళవారం ఉదయం జంతర్ మంతర్ దగ్గరకు చేరుకున్న కార్యకర్తలు.. ఇనుప గేటు, పోలీసుల బారికేడ్లు దాటి లోపలికి వెళ్లేందుకు ప్రయత్నించారు. దీంతో పోలీసులు వారిని అదుపులోకి తీసుకున్నారు. ఈ విషయాన్ని పార్టీ వ్యవస్థాపకుడు అభిజీత్ దీప్కే సోషల్ మీడియా ద్వారా వెల్లడించారు.
సీన్‌లోకి వచ్చిన సీజేపీ కార్యకర్తలు చేతుల్లో జాతీయ జెండాలు పట్టుకుని గేటు దూకి జంతర్ మంతర్ ప్రాంతంలోకి ప్రవేశించిన దృశ్యాలు వీడియోలో కనిపించాయి. పోలీసులు వారిని అడ్డుకునేందుకు ప్రయత్నించగా.. కార్యకర్తలు నినాదాలు చేస్తూ ముందుకు వెళ్లారు. ‘భారత్ మాతా కీ జై’, ‘ఇంక్విలాబ్ జిందాబాద్’ అంటూ నినదించారు. పోలీసులు వారిని అదుపులోకి తీసుకుని తరలించారు.
జంతర్ మంతర్‌ను నిరసన స్థలంగా గుర్తించడాన్ని కేంద్రం రద్దు చేయడంపై సీజేపీ వ్యవస్థాపకుడు అభిజీత్ దీప్కే తీవ్రంగా స్పందించారు. ‘‘నిరసనను డీనోటిఫై చేయలేరు’’ అంటూ సోషల్ మీడియాలో పోస్టు చేశారు. జంతర్ మంతర్‌ను నిరసన ప్రదేశాల జాబితా నుంచి తొలగించినంత మాత్రాన ఆందోళనలు ఆగిపోవని వ్యాఖ్యానించారు. ‘‘ప్రధాని భయం ఈ నిర్ణయంలో స్పష్టంగా కనిపిస్తోంది. జంతర్ మంతర్‌ను అధికారిక నిరసన స్థలంగా తొలగిస్తే ఆందోళనలు ఆగిపోతాయని భావిస్తున్నారు. కానీ అలా జరగదు. దేశవ్యాప్తంగా జంతర్ మంతర్లు వెలుస్తాయి’’ అని దీప్కే పేర్కొన్నారు.
కేంద్ర హోం మంత్రిత్వ శాఖ ఆధ్వర్యంలోని కమిటీ సిఫార్సుల మేరకు ఢిల్లీలో నిరసనలు, ధర్నాల కోసం మూడు కొత్త ప్రదేశాలను ఖరారు చేసినట్లు అధికారులు తెలిపారు. రాంలీలా మైదాన్, బురారీ మైదాన్, తూర్పు ఢిల్లీలోని సీబీడీ మైదాన్‌ను ప్రతిపాదించాయి. అత్యంత భద్రత ఉండే మధ్య ఢిల్లీలోని జంతర్ మంతర్ ఇప్పటివరకు నిరసనలకు ప్రత్యేకంగా కేటాయించిన ప్రాంతంగా ఉండేది. తాజా నిర్ణయంతో ఇకపై నిరసనలకు అనుమతి ఉండదని నివేదికలు పేర్కొన్నాయి.
ప్రత్యేక ఓటర్ల జాబితా సవరణ (SIR) వివాదం, ప్రధాన ఎన్నికల కమిషనర్ జ్ఞానేశ్ కుమార్ రాజీనామా డిమాండ్‌తో ఢిల్లీలో ప్రతిపక్ష ఇండియా కూటమి, సీజేపీ నిరసనలు చేపడుతున్నాయి. ఈ నేపథ్యంలో అక్టోబర్ 10 నుంచి ఢిల్లీ పోలీసులు జంతర్ మంతర్ దగ్గర భద్రతను కట్టుదిట్టం చేశారు. నిరసనకారులను ఆ ప్రాంతంలోకి అనుమతించడం లేదు. అక్టోబర్ 10న ఢిల్లీకి చేరుకున్న సీజేపీ నేతలు అభిజీత్ దీప్కే, సౌరవ్ దాస్, ఆశుతోష్ రంకాలను విమానంలోనే అదుపులోకి తీసుకున్నారు.