Sahil Wakode Death: ‘‘నేను తప్పు చేశా’’.. ఆత్మహత్యకు ముందు స్నేహితురాలికి సాహిల్ చివరి కాల్..

Sahil Wakode Death: IIT బాంబే విద్యార్థి సాహిల్ వాకోడే ఆత్మహత్య వ్యవహారం సంచలనంగా మారింది. ఫ్రొపెసర్లు కులం పేరుతో వేధించడం వల్లే తమ కుమారుడు చనిపోయాడని సాహిల్ తల్లిదండ్రులు ఆరోపిస్తున్నారు. మరోవైపు, పరీక్షా సమయంలో చాట్‌జీపీటీ ద్వారా సమాధానాలు పొందే ప్రయత్నం చేయడంతో ప్రొఫెసర్ సూర్యనారాయణ దూల్లా ఎగ్జామ్ హాల్ నుంచి బయటకు పంపించారనే వాదన ఉంది. సాహిల్ మృతిపై ప్రస్తుతం ముంబై క్రైమ్ బ్రాంచ్ దర్యాప్తు చేస్తోంది. ఎగ్జామ్ హాల్‌లోని సీసీటీవీ ఫుటేజ్‌తో పాటు కారిడార్లలోని దృశ్యాలను పరిశీలిస్తోంది. సాహిల్ ఆత్మహత్య చేసుకున్న హాస్టల్ గది వరకు అతడి కదలికల్ని దర్యాప్తు చేస్తోంది.

ఇదిలా ఉంటే, ఈ కేసులో కీలక పరిణామం చోటుచేసుకుంది. ఆత్మహత్యకు కొన్ని గంటల ముందు, సాహిత్ తన స్నేహితురాలితో మాట్లాడినట్లు తెలుస్తోంది. ‘‘నేను తప్పు చేశాను. నా థర్మో డైనమిక్స్ పేపర్ కూడా సరిగా రాయలేదు. ఇప్పుడు ఇది జరిగింది’’ అని చెప్పినట్లు దర్యాప్తులో తేలిందని సమాచారం. ఈ సంభాషణల్లో ఎలాంటి కుల వివక్ష ప్రస్తావనను సాహిల్ ప్రస్తావించనట్లు సంబంధిత వర్గాలు తెలిపాయి. సాహిల్ తన స్నేహితురాలితో సెప్టెంబర్ 18న మధ్యాహ్నం 2.30 గంటలకు మాట్లాడినట్లు తెలుస్తోంది. ఆ తర్వాత సాహిల్ తన ఫోన్‌కు స్పందించలేదని పోలీసుల ముందు ఆమె వాంగ్మూలం ఇచ్చినట్లు తెలుస్తోంది. సాహిల్ మరణవార్త విని తాను చాలా ఆందోళన చెందినట్లు వాంగ్మూలంలో పేర్కొన్నారు.

సాహిల్ మరణానికి ప్రొఫెసర్ సూర్యనారాయణ దూల్లా కారణమని అతడి తల్లిదండ్రులు ఆరోపించారు. దూల్లాతో పాటు ఐఐటీ బాంబే డైరెక్టర్ శిరీష్ కేదారేను అరెస్ట్ చేయాలని డిమాండ్ చేశారు. తన కుమారుడు కులవివక్ష ఎదుర్కొన్నాడని, ఒత్తిడిని ఎదుర్కొన్నట్లు వారు ఆరోపించారు. ఇదిలా ఉంటే, దూల్లాకు బాంబే ఫ్యాకల్లీ ఫోరం, ఇతర ఐఐటీల ఉపాధ్యాయులు మద్దతుగా నిలుస్తున్నారు. కొందరు విద్యార్థులు కూడా ఆయనకు సంఘీభావం ప్రకటిస్తున్నారు. IIT బాంబే బోర్డ్ ఆఫ్ గవర్నర్స్ 10 మంది సభ్యులతో ఉన్నతస్థాయి కమిటీని ఏర్పాటు చేసింది. ప్రొఫెసర్ రమేశ్ వెంకటేశ్వరన్ నేతృత్వంలోని కమిటీ సహిల్ మృతికి దారితీసిన పరిస్థితులను పరిశీలించనుంది. కమిటీ వారంలోగా నివేదిక ఇవ్వాల్సి ఉంది.