Kesar Mango Record: పండ్ల రాజు గిర్ కేసర్ మామిడి.. 10 ఏళ్ల రికార్డులు బద్దలు

Kesar Mango Record: గుజరాత్‌లోని ప్రసిద్ధ తలాలా మామిడి మార్కెట్‌లో ఈ ఏడాది కేసర్ మామిడి సీజన్ చరిత్ర సృష్టించింది. కేవలం 61 రోజుల్లోనే 9.44 లక్షల బాక్సుల కేసర్ మామిడి మార్కెట్‌కు చేరి గత పదేళ్ల రికార్డులను అధిగమించింది. అధిక దిగుబడి, అద్భుతమైన నాణ్యత, దేశీయ-అంతర్జాతీయ మార్కెట్లలో భారీ డిమాండ్ కారణంగా రైతులు, వ్యాపారులు మంచి లాభాలను ఆర్జించారు. పండ్ల రాజుగా పేరుగాంచిన కేసర్ మామిడి ఈసారి రైతులకు వరంగా మారింది. రెండు నెలల పాటు కొనసాగిన వ్యాపార కాలంలో తలాలా మార్కెట్‌కు రికార్డు స్థాయిలో మామిడి పండ్లు చేరాయి. ఇటీవలి సంవత్సరాల్లో ఇదే అత్యధిక సరుకు రాకగా మార్కెట్ వర్గాలు చెబుతున్నాయి. సీజన్ అంతటా డిమాండ్ నిలకడగా ఉండటంతో రైతులకు గిట్టుబాటు ధరలు లభించాయి.

ఈ ఏడాది అనుకూల వాతావరణ పరిస్థితులు మామిడి దిగుబడిని పెంచాయి. అంతేకాకుండా కేసర్ మామిడి నాణ్యత కూడా అత్యుత్తమంగా ఉండటంతో దేశవ్యాప్తంగా కొనుగోలుదారులు ఆసక్తి చూపారు. దీంతో ఉత్పత్తి పెరగడమే కాకుండా రైతుల ఆదాయం కూడా గణనీయంగా పెరిగింది. గిర్ కేసర్ మామిడి దేశీయ మార్కెట్‌కే పరిమితం కాకుండా విదేశీ మార్కెట్లలో కూడా తన ప్రత్యేకతను చాటుకుంది. ఈ సీజన్‌లో సుమారు 90 టన్నుల కేసర్ మామిడి పండ్లు ఎగుమతి అయ్యాయి. ముఖ్యంగా యునైటెడ్ కింగ్‌డమ్, దుబాయ్, కెనడా వంటి దేశాల్లో గిర్ కేసర్ మామిడికి మంచి డిమాండ్ నమోదైంది.

రికార్డు స్థాయిలో మార్కెట్‌కు సరుకు రాక, నాణ్యమైన దిగుబడి, ఎగుమతుల పెరుగుదలతో ఈ సీజన్ రైతులు, వ్యాపారులకు చిరస్మరణీయంగా నిలిచింది. తలాలాలో కేసర్ మామిడి పంట అద్భుతంగా పండటంతో గిర్ సోమనాథ్ జిల్లా మరోసారి దేశీయ, అంతర్జాతీయ స్థాయిలో కేసర్ మామిడి కేంద్రంగా గుర్తింపు పొందిందని మామిడి ఏపీఎంసీ ఛైర్మన్ సంజయ్ షింగాలా తెలిపారు.