Delhi Protest: వరస నిరసనల కారణంగా ఢిల్లీలోని వ్యాపారులు తీవ్రంగా నష్టపోతున్నారు. ముఖ్యంగా దసరా, దీపావళి సమయంలో కాక్రోచ్ జనతా పార్టీ(సీజేపీ), ఇతర రాజకీయ పార్టీలు నిరసనలకు పిలుపునివ్వడంతో తాము నష్టపోతున్నామని వ్యాపారులు ఆవేదన వ్యక్తం చేస్తున్నారు. దీపావళి ముగిసే వరకు ఢిల్లీలో నిరసనలు, ప్రదర్శనలకు అనుమతి ఇవ్వవద్దని కోరుతూ ఛాంబర్ ఆఫ్ ట్రేడ్ అండ్ ఇండస్ట్రీ (CTI) కేంద్ర హోం మంత్రి అమిత్ షాకు లేఖ రాసింది. పండగల సమయంలో నిరసనల కారణంగా మార్కెట్లలో రద్దీ తగ్గి, వ్యాపారాలు భారీగా నష్టపోయే అవకాశం ఉందని ఆందోళన వ్యక్తం చేసింది.
అక్టోబర్ 16న సీజేపీ కన్నాట్‌ప్లేస్‌ వద్ద ఆందోళనకు పిలుపునిచ్చింది. దీని వల్ల ఢిల్లీలోని సుమారు 20 లక్షల మంది వ్యాపారులపై ప్రభావం పడే అవకాశం ఉందని పేర్కొంది. కన్నాట్ ప్లేస్, జన్‌పథ్, ఖాన్ మార్కెట్ వంటి ప్రధాన వాణిజ్య ప్రాంతాల్లో నిరసనల కారణంగా ట్రాఫిక్‌కు అంతరాయం కలగవచ్చని CTI ఆందోళన వ్యక్తం చేసింది.
ఇదిలా ఉంటే, అక్టోబర్ 10 నాటి సీజేపీ నిరసనల వల్ల ఢిల్లీలో లాక్‌డౌన్ తరహా పరిస్థితులు ఏర్పడ్డాయని CTI పేర్కొంది. ఆ రోజు మార్కెట్‌కు జనాలు రాకపోవడం వల్ల సుమారు రూ. 2000 కోట్ల నష్టం వాటిల్లిందని అంచనా వేసింది. నవరాత్రులు, దీపావళి వ్యాపారాలపై నిరసనల ప్రభావం పడుతోందని తెలిపింది. నిరసనల వల్ల రోడ్లు బ్లాక్ చేస్తే వినియోగదారులు షాపింగ్‌కు రాకపోవచ్చని పేర్కొంది.