Liquor Shops: మందు బాబులకు గుడ్‌న్యూస్‌.. నిషేధ రోజుల జాబితా నుంచి హోలీ తొలగింపు..

Liquor Shops: మందుబాబులకు గుడ్‌న్యూస్ చెప్పింది ఢిల్లీ సర్కార్‌… ఈ సంవత్సరం హోలీ రోజున రాజధాని ఢిల్లీలో డ్రై డే ఉండదు. హోలీ పండుగను నిషేధ రోజుల జాబితా నుండి ఎక్సైజ్ శాఖ తొలగించింది. దీంతో హోలీ నాడు మద్యం దుకాణాలు యథావిధిగా తెరిచి ఉంటాయి. జనవరి 15న జారీ చేసిన ఉత్తర్వుల్లో, ఈ సంవత్సరం రాజధానిలో కేవలం ఐదు రోజులు మాత్రమే డ్రై డేలుగా పాటించనున్నట్లు ఎక్సైజ్ శాఖ స్పష్టం చేసింది. గతంలో హోలీ రోజున కూడా మద్యం అమ్మకాలపై ఆంక్షలు అమలులో ఉండేవి. అయితే ఈసారి ఆ జాబితాలో హోలీని చేర్చలేదు.

ఈ సంవత్సరం డ్రై డేల జాబితాలో ఉన్న రోజులు ఇవి:
– గణతంత్ర దినోత్సవం
– మహాశివరాత్రి
– ఈద్ ఉల్ ఫితర్
-శ్రీరామ నవమి
– మహావీర్ జయంతి

పై పేర్కొన్న ఐదు రోజుల్లో మాత్రమే రాజధానిలోని మద్యం దుకాణాలు పూర్తిగా మూసివేయబడతాయి. మిగతా అన్ని రోజులలో లైసెన్స్ పొందిన దుకాణాలు సాధారణ షెడ్యూల్ ప్రకారం పనిచేస్తాయి. అయితే, డ్రై డేల జాబితా నుండి హోలీని తొలగించడం విస్తృత చర్చకు దారితీసింది. పండుగ రోజుల్లో మద్యం అమ్మకాలపై ఆంక్షలు అవసరమా అనే అంశంపై భిన్నాభిప్రాయాలు వ్యక్తమవుతున్నాయి. అయితే అధికారికంగా ప్రకటించిన జాబితా ప్రకారం, హోలీ రోజున ఎలాంటి నిషేధం ఉండదు. ఈ నిర్ణయం నేపథ్యంలో హోలీ పండుగ రోజు మార్కెట్లు, మద్యం దుకాణాలు సాధారణంగా కార్యకలాపాలు నిర్వహించే అవకాశం ఉంది.