Vijayashanti: నటించాలని లేదు కానీ.. విజయశాంతి ఆసక్తికర వ్యాఖ్యలు!

చిన్న సినిమాలకు ప్రేక్షకులు, మీడియా నుంచి మరింత ప్రోత్సాహం అవసరమని ప్రముఖ నటి, రాజకీయ నాయకురాలు విజయశాంతి అన్నారు. మంచి కథలు, కొత్త ఆలోచనలతో వచ్చే చిన్న చిత్రాలకు తగిన గుర్తింపు లభిస్తే.. తెలుగు సినీ పరిశ్రమ మరింత బలోపేతం అవుతుందని అభిప్రాయపడ్డారు. పెద్ద సినిమాలతో పోలిస్తే చిన్న చిత్రాలకు తక్కువ సపోర్ట్ లభిస్తోందని, కానీ చిన్న సినిమాల్లోనే దమ్ము ఉంటుందని విజయశాంతి పేర్కొన్నారు. ‘కర్మాఖ్య’ సినిమా ట్రైలర్ లాంచ్ కార్యక్రమంలో పాల్గొన్న విజయశాంతి ఈ వ్యాఖ్యలు చేశారు. ఈ చిత్రానికి అదిరే అభి (అభినయ కృష్ణ) దర్శకత్వం వహించారు. జూలై 31న కర్మాఖ్య సినిమా విడుదల కానుంది.

‘పెద్ద సినిమాలతో పోలిస్తే చిన్న చిత్రాలకు తక్కువ సపోర్ట్ లభిస్తోంది. అయితే చిన్న సినిమాల్లోనే దమ్ముంటుంది. కొత్తదనం, బలమైన కథలు, ప్రతిభ దాగి ఉంటాయి. ప్రేక్షకులు ఇలాంటి చిత్రాలను ఆదరిస్తే మరింత మంది కొత్త దర్శకులు, నటీనటులు పరిశ్రమకు వస్తారు. చిన్న సినిమా నిర్మాతలకు మీడియా సహకారం ఎంతో అవసరం. కొత్త కథలు, వినూత్న ఆలోచనలతో వచ్చే చిత్రాలు ప్రేక్షకుల దృష్టికి వెళ్లాలంటే మీడియా కీలక పాత్ర పోషించాలి. ప్రారంభ దశలో మీడియా అండ ఉంటే చిన్న సినిమాలు కూడా పెద్ద విజయాలు సాధించగలవు’ అని లేడీ సూపర్ స్టార్ విజయశాంతి పేర్కొన్నారు.

‘కర్మాఖ్య సినిమా కోసం నటి అభినయ గుండు చేయించుకోవాల్సిన అవసరం లేదు. ఆమె చేసిన అంకితభావానికి ప్రేక్షకులు తప్పకుండా ఆదరణ చూపిస్తారు. సినిమా విజయం ద్వారా ఆ కష్టానికి సరైన గుర్తింపు లభిస్తుంది. ప్రస్తుతం ఏ ప్రాంతం నుంచి వచ్చిన హీరోయిన్ అయినా తెలుగు ప్రేక్షకులు ఆదరిస్తున్నారు. ప్రతిభకు మాత్రమే ప్రాధాన్యం ఇస్తున్న తెలుగు ప్రేక్షకుల ఆదరణ వల్లే తెలుగు సినిమా పరిశ్రమ మరింత విస్తరిస్తోంది. ప్రస్తుతం నేను రాజకీయాల్లో బిజీగా ఉన్నాను. అందుకే నటించే ఆలోచన లేదు. బలమైన కథ, ఆకట్టుకునే మంచి పాత్ర వస్తే మాత్రం తప్పకుండా ఆలోచిస్తా’ అని విజయశాంతి వెల్లడించారు.