తెలుగు చిత్రసీమలో మరో విషాదం చోటుచేసుకుంది. తనదైన నటనతో దశాబ్దాల పాటు ప్రేక్షకులను అలరించిన సీనియర్ నటుడు గిరిబాబు (80) ఇక లేరు. గత కొంతకాలంగా వయోభారం రీత్యా ఏర్పడ్డ అనారోగ్య సమస్యలతో బాధపడుతున్న ఆయన, ఓ ప్రైవేట్ ఆస్పత్రిలో చికిత్స పొందుతూ తుదిశ్వాస విడిచారు. ఆయన మరణవార్త విన్న సినీ ప్రముఖులు, అభిమానులు తీవ్ర దిగ్భ్రాంతికి గురవుతున్నారు. 1943 జూన్‌ 8న ప్రకాశం జిల్లాలో జన్మించిన గిరిబాబు, సినిమాలపై ఉన్న మక్కువతో ఇండస్ట్రీలోకి అడుగుపెట్టారు. 1973లో విడుదలైన ‘జగమే మాయ’ చిత్రంతో ప్రతినాయకుడిగా తన సినీ ప్రస్థానాన్ని ప్రారంభించి, ఆ తర్వాత తనదైన విలనిజంతో వెండితెరపై చెరగని ముద్ర వేశారు.
!
కేవలం నటనకే పరిమితం కాకుండా దర్శకుడిగా, నిర్మాతగా కూడా తన సత్తా చాటుకోవడం గిరిబాబు ప్రత్యేకత. దాదాపు 50 ఏళ్ల సుదీర్ఘ సినీ ప్రయాణంలో ఆయన ఏకంగా 600కు పైగా చిత్రాల్లో నటించడం విశేషం. క్రూరమైన విలన్ పాత్రల నుంచి కడుపుబ్బ నవ్వించే కామెడీ పాత్రల వరకు, ఆపై బరువైన తండ్రి, తాతయ్య పాత్రల వరకు ఏ పాత్రలోనైనా ఇట్టే ఒదిగిపోయేవారు. ఐదు దశాబ్దాల పాటు తెలుగు సినీ ఇండస్ట్రీలో తనకంటూ ఒక ప్రత్యేక అధ్యాయాన్ని లిఖించుకున్న గిరిబాబు మరణం టాలీవుడ్‌కు తీరని లోటు. ఆయన ఆత్మకు శాంతి చేకూరాలని కోరుకుంటూ సినీ లోకం నివాళులర్పిస్తోంది.