Unstoppable with NBK: సీజన్ 2కు ముహూర్తం ఖరారైంది!
ఆహా ఓటీటీలో సూపర్ డూపర్ హిట్ అయిన ప్రోగ్రామ్ ‘అన్ స్టాపబుల్ విత్ ఎన్బీకే’! నందమూరి నట సింహం బాలకృష్ణ అంత ఓపెన్ గా తన ఎదురుగా కూర్చున్న సెలబ్రిటీస్ ను ప్రశ్నలు అడుగుతారని కానీ వారు అంతే స్పోర్టివ్ గా తీసుకుని వాటికి జవాబులు చెబుతారని కానీ ఆ ప్రోగ్రామ్ చూసే వరకూ ఎవరూ ఊహించలేదు. బాలకృష్ణ అడిగిన ప్రశ్నలు, వాటికి ఫిల్మ్ సెలబ్రిటీస్ చెప్పిన సమాధానాల వీడియోస్ చూసి నివ్వెర పోయారు. దాంతో ఈ షోకు సూపర్ రెస్పాన్స్ వచ్చింది.
ఇంత సూపర్ హిట్ అయిన ‘అన్ స్టాపబుల్’ కార్యక్రమం సీజన్ 2 ఎప్పుడెప్పుడు మొదలవుతుందా అనే ఆసక్తిని చాలామంది కనబరుస్తున్నారు. అలానే బాలకృష్ణతో కాకుండా వేరెవరితో అయినా ‘అన్ స్టాపబుల్ షో’ చేస్తారేమో అనే సందేహాన్నీ కొందరు వ్యక్తం చేశారు. ఈ శుక్రవారం ప్రసారం అయిన తెలుగు ఇండియన్ ఐడల్ ‘అన్ స్టాబుల్ టాప్ 6’ ప్రోగ్రామ్ లో దీనికి సంబంధించిన సమాధానం దొరికింది. కార్యక్రమం చివరిలో బాలకృష్ణను వ్యాఖ్యాత, ప్రముఖ గాయకుడు శ్రీరామచంద్ర ‘ధైర్యం చేసి ఓ ప్రశ్న అడుగుతున్నాను… అన్ స్టాపబుల్ సీజన్ 2 ఎప్పుడు?’ అని అడిగాడు. దానికి బాలకృష్ణ నవ్వుతూ ‘మధుర క్షణాలకు ముగింపు ఉండదు… కొనసాగింపే’ అంటూ బదులిచ్చారు. సో… అన్ స్టాపబుల్ షో సీజన్ 2 బాలకృష్ణతోనే ఉండబోతోందనేది ఖాయం. అలానే దీనిని దసరా కానుకగా జనం ముందుకు తీసుకొస్తారని తెలుస్తోంది. సో… బాలకృష్ణ అభిమానులు, సినీ ప్రేమికులకు ‘దసరా పండగ డబుల్ బొనంజా’ను ఇవ్వబోతోంది. బహుశా ఆ షో మెగాస్టార్ చిరంజీవితోనే మొదలైనా ఆశ్చర్యపోనక్కర్లేదు. ఎందుకంటే… తెలుగు ఇండియన్ ఐడల్ సెమీస్ కు బాలకృష్ణ గెస్ట్ గా వస్తే, ఫైనల్స్ కు చిరంజీవి హాజరు కాబోతున్నారు.