Tollywood: షాక్ ఫ్యాక్టర్లు లీక్ ఫ్యాక్టర్లవుతుంటే ఎలా?

ఈ మధ్యకాలంలో టాలీవుడ్ సినిమాల్లో రొటీన్‌కు భిన్నంగా హీరోల చేత ఏమైనా చేయించడానికి దర్శక నిర్మాతలు వెనుకాడడం లేదు. హీరోలు కూడా తమ ఇమేజ్ గురించి ఆలోచించకుండా, కథకి ఏం కావాలో, అది 100% చేయడానికి ప్రయత్నిస్తున్నారు. అయితే, వారు చేస్తున్న ఆ ప్రయత్నాలన్నీ వృధా అవుతున్నాయి. ఎందుకంటే, సినిమా దర్శకుడు షాక్ ఫ్యాక్టర్‌గా ఫీలైన సినిమాలోని ట్విస్టులు, ముందుగానే సినిమా టీం ద్వారా లీక్ అయిపోతున్నాయి. ఇది సినిమా మీద బిగ్ ఇంపాక్ట్ చూపిస్తోంది. ఇటీవల విడుదలైన పెద్ద సినిమాతో పాటు, నేడు విడుదలైన ‘లెనిన్’ సినిమాకి కూడా ఇదే పరిస్థితి ఎదురైంది.

ఈ సినిమాకి సంబంధించిన షాక్‌లు సోషల్ మీడియాలో దాదాపు మూడు, నాలుగు నెలల ముందు నుంచే కనిపిస్తూ వస్తున్నాయి. ఒక రకంగా మరి ఆడియన్స్‌ని ప్రిపేర్ చేయడానికి సినిమా టీమే ఇలా లీకులు ఇస్తుందో, లేక సినిమా కోసం షూటింగ్ సమయంలో పనిచేసిన వారు ఎవరైనా లీక్ చేస్తున్నారో, లేక సినిమా టీం నుంచే పొరపాటున లీక్ అవుతున్నాయో తెలియదు కానీ, ఊరు పేరు లేని సోషల్ మీడియా అకౌంట్ల ద్వారా ఈ విషయాలు బయటకి వస్తున్నాయి. తొలుత నమ్మకుండా ఉన్నా, సినిమా రిలీజ్ అయ్యాక మాత్రం అది నమ్మాల్సిన పరిస్థితి ఏర్పడుతోంది. ఈ విషయాలు ముందే తెలియడం వల్ల అవి ఎప్పుడు జరుగుతాయా అని ఎదురుచూస్తున్నారు తప్ప, వాటిని ఒక షాక్ ఫ్యాక్టర్‌లాగా ఫీల్ అవ్వాల్సిన ఫీలింగ్ మిస్ అవుతోంది. మొత్తం మీద ఇదే పరిస్థితి కొనసాగితే, భవిష్యత్తులో సినిమాకి సంబంధించి ఎక్సైట్‌మెంట్ కిల్ అయిపోతుంది అనడంలో ఎలాంటి సందేహం లేదు.