Saravanan: ‘ది లెజెండ్’ వెనుక తిరుపతి ప్రసాద్!
సీనియర్ స్టార్ హీరో నాగార్జున ‘ది ఘోస్ట్’ మూవీలో నటిస్తుంటే… పక్కన కర్ణాటకలోని మరో స్టార్ హీరో శివ రాజ్ కుమార్ ‘ఘోస్ట్’ పేరుతో ఓ సినిమా చేస్తున్నారు. అలానే ఆ మధ్య నందమూరి బాలకృష్ణ ‘లెజెండ్’తో జనం ముందుకు వస్తే… ఇప్పుడు తమిళనాడులో శరవణన్ ‘ది లెజెండ్’ పేరుతో హీరోగా ఎంట్రీ ఇస్తున్నాడు. శరవణన్ న్యూ శరవణ స్టోర్స్ ప్రొడక్షన్స్ బ్యానర్ మీద తానే ఈ చిత్రాన్ని నిర్మిస్తున్నారు. ఎమోషన్, యాక్షన్, రొమాన్స్, కామెడీ కమర్షియల్ ఎలిమెంట్స్ కూడిన ఈ మాస్ చిత్రానికి కథ, స్క్రీన్ప్లే, జెడి-జెర్రీ సమకూర్చి, దర్శకత్వం వహించారు. ఈ సినిమా జూలై 28న తమిళ, తెలుగు, కన్నడ, మలయాళ, హిందీ భాషల్లో గ్రాండ్గా విడుదల కానుంది. ‘ది లెజెండ్’ థియేట్రికల్ హక్కులను వివిధ పరిశ్రమల్లోని ప్రముఖులు సొంతం చేసుకున్నారు. శ్రీ లక్ష్మీ మూవీస్ సంస్థ తిరుపతి ప్రసాద్ ఈ చిత్రాన్ని తెలుగు రాష్ట్రాల్లో విడుదల చేయనున్నారు.
ఒక సామాన్యుడు తన శ్రమ, సమర్ధత, బలంతో అన్ని అడ్డంకులను అధిగమించి ‘లెజెండ్’గా ఎలా నిలిచాడనేది ఈ సినిమాలో గ్రాండియర్ గా చూపించబోతున్నారు. శరవణన్ మైక్రో బయాలజీ శాస్త్రవేత్తగా కనిపించనున్న ఈ మూవీ మెడికల్ మాఫియా నేపధ్యంలో రూపుదిద్దుకుంది. చెన్నై, కుంభకోణం, పొల్లాచ్చి, హిమాలయాల్లో దీని చిత్రీకరణ జరిపారు. ఈ సినిమా షూటింగ్ కోసం చెన్నైలో భారీ సెట్ వేశారు. ముఖ్యమైన సన్నివేశాలు, పాటలను ఉక్రెయిన్లో యుద్ధం ప్రారంభానికి ముందు చిత్రీకరించారు. ఐటమ్ సాంగ్స్ తో పాపులరైన ముంబై మోడల్ ఊర్వశి రౌతేలా ఈ చిత్రంలో హీరోయిన్ గా నటించింది. ప్రముఖ హాస్యనటుడు వివేక్కి ఇదే చివరి సినిమా. అలానే మరో కమెడియన్ యోగిబాబు ఇందులో కీలక పాత్ర పోషించాడు. హారిస్ జయరాజ్ ఈ చిత్రానికి సంగీతం సమకూర్చగా, ఆర్వేల్రాజ్ సినిమాటోగ్రఫీ అందించారు.