The Paradise: ప్యారడైజ్ సినిమా కోసం ఎన్ని టన్నుల రక్తం వాడారో తెలుసా.?

The Paradise: న్యాచురల్ స్టార్ నాని, డైరెక్టర్ శ్రీకాంత్ ఓదెల కాంబినేషన్‌లో వస్తున్న మోస్ట్ అవైటెడ్ యాక్షన్ థ్రిల్లర్ ‘ది ప్యారడైజ్’. ‘దసరా’ తర్వాత వీరిద్దరి కలయికలో వస్తున్న చిత్రం కావడంతో దీనిపై అంచనాలు భారీగా ఉన్నాయి. ఇటీవల ఇచ్చిన ఓ ఇంటర్వ్యూలో ప్రముఖ ఫైట్ మాస్టర్స్ రామ్-లక్ష్మణ్ ఈ సినిమా యాక్షన్ సీక్వెన్సులకు సంబంధించి పలు షాకింగ్ విషయాలను వెల్లడించారు. ‘ది ప్యారడైజ్’ యాక్షన్ సీక్వెన్సులు సాధారణంగా ఉండవని, ‘దసరా’ కంటే డబుల్, ట్రిపుల్ హెవీగా ఉంటాయని మాస్టర్స్ స్పష్టం చేశారు. “టీజర్‌లో బ్లడ్ ఎక్కువైంది అనుకుంటున్నారు కానీ, సినిమాలో ఏకంగా రెండు మూడు టన్నుల రక్తం కనిపిస్తుంది” అంటూ నవ్వుతూనే సినిమా వైలెన్స్ తీవ్రతను బయటపెట్టారు. సాధారణంగా సినిమాల్లో ఫైట్స్ ఉంటాయి, కానీ ఈ చిత్రంలో ఫైట్ల మధ్యలోనే సినిమా నడుస్తుందని చెప్పారు. రెండు బ్లాక్స్ కంపోజ్ చేయడానికే తమకు 20 రోజుల సమయం పట్టిందని, తమతో పాటు రియల్ సతీష్, నవకాంత్ కూడా యాక్షన్ విభాగంలో పనిచేశారని పేర్కొన్నారు.

ఈ చిత్రంలో నాని లుక్, బాడీ లాంగ్వేజ్ భారతీయ తెరపై ఇప్పటివరకు రాని విధంగా కొరియన్ సినిమాల తరహాలో డిజైన్ చేశారు. రెండు జడలు వేసుకుని బేర్‌బాడీతో పోరాడే పాత్ర ఇది. అయితే షర్టు లేకపోవడం వల్ల శరీరానికి రోప్స్ కట్టడానికి ఏమాత్రం వీలులేకుండా పోయిందని, దాంతో నాని డూప్ లేకుండా, రోప్ సపోర్ట్ లేకుండానే రియల్ ఇంపాక్ట్ కోసం స్వయంగా బరిలోకి దిగాల్సి వచ్చిందని వివరించారు. అసలు ఆ బాధ ఎలా ఉంటుందో తెలుసుకోవడానికి మొదట తమ అసిస్టెంట్లకు జడలు వేయించి, మెడలో డాలర్లు తగిలించి ట్రయల్స్ వేసినట్లు వెల్లడించారు. ఉదయం 9 గంటల నుంచి అర్ధరాత్రి 2 గంటల వరకు తిండి కూడా లేకుండా డైట్ పాటిస్తూ, బేర్‌బాడీ మెయింటైన్ చేయడానికి నాని పక్కనే డంబెల్స్ పెట్టుకుని వర్కౌట్లు చేస్తూ విపరీతంగా శ్రమించారని రామ్-లక్ష్మణ్ ప్రశంసించారు. శ్రీకాంత్ ఓదెల పట్టుదల, రాజీపడని నైజం సుకుమార్‌ను తలపిస్తుందని, నాని డెడికేషన్ థియేటర్లలో ప్రేక్షకులకు సరికొత్త యాక్షన్ విజువల్స్ అందిస్తుందని వారు ధీమా వ్యక్తం చేశారు.