Dada: గంగూలీ బయోపిక్ నుంచి బర్త్‌డే ట్రీట్.. ‘దాదా’ ఫస్ట్ లుక్‌కు టైమ్ ఫిక్స్

Dada: ప్రేక్షకుల గుండెల్లో ‘దాదా’గా చెరగని ముద్ర వేసుకున్న సౌరవ్ గంగూలీ జీవితం ఇప్పుడు వెండితెరపై ఆవిష్కృతం కాబోతోంది. భారత క్రికెట్ చరిత్రను మలుపుతిప్పిన కెప్టెన్ ప్రయాణాన్ని చూపించే ఈ బయోపిక్‌పై ఇప్పటికే భారీ అంచనాలు ఉన్నాయి. అయితే గంగూలీ పుట్టినరోజు సందర్భంగా, ఈ ప్రాజెక్ట్ నుంచి అభిమానులకు ప్రత్యేక సర్‌ప్రైజ్ సిద్ధమవుతోందన్న వార్త సోషల్ మీడియాలో వైరల్ అవుతోంది. దీంతో క్రికెట్ అభిమానులతో పాటు సినీ ప్రేక్షకుల దృష్టి కూడా ఇప్పుడు జూలై 8పైనే నిలిచింది. ‘దాదా – ది సౌరవ్ గంగూలీ స్టోరీ’ పేరుతో తెరకెక్కుతున్న ఈ బయోపిక్‌లో బాలీవుడ్ నటుడు రాజ్‌కుమార్ రావు ప్రధాన పాత్రలో కనిపించనున్నారు. సౌరవ్ గంగూలీ పాత్రలో ఆయన ఎలా కనిపిస్తారనే ఆసక్తి మొదటి రోజు నుంచే నెలకొంది. ఈ ఏడాది ఏప్రిల్‌లో సినిమా రెగ్యులర్ షూటింగ్ ప్రారంభమవగా, ప్రస్తుతం చిత్రీకరణ వేగంగా సాగుతోంది. ఈ నేపథ్యంలో జూలై 8న గంగూలీ పుట్టినరోజు సందర్భంగా సినిమా ఫస్ట్ గ్లింప్స్‌ను విడుదల చేయాలని నిర్మాతలు నిర్ణయించినట్లు ప్రచారం జరుగుతోంది.

తాజా సమాచారం ప్రకారం, ఫస్ట్ గ్లింప్స్‌తో పాటు సినిమా విడుదల తేదీని కూడా అదే రోజు ప్రకటించే అవకాశం ఉన్నట్లు తెలుస్తోంది. దీనిపై అధికారిక ప్రకటన ఇంకా వెలువడనప్పటికీ, మేకర్స్ ప్రత్యేక ప్లానింగ్‌తో ముందుకు వెళ్తున్నారని టాక్ వినిపిస్తోంది. ఒకవేళ ఇదే నిజమైతే, గంగూలీ అభిమానులకు ఆయన పుట్టినరోజున ఇది మరపురాని కానుకగా నిలిచే అవకాశముంది. భారత క్రికెట్‌లో సౌరవ్ గంగూలీ ప్రయాణం ఎంతో ప్రత్యేకమైనది. క్లిష్ట పరిస్థితుల్లో జట్టుకు నాయకత్వం వహించి, యువ ఆటగాళ్లకు అవకాశాలు కల్పిస్తూ భారత జట్టును ప్రపంచ క్రికెట్‌లో దూకుడుగా నిలబెట్టిన కెప్టెన్‌గా ఆయనకు ప్రత్యేక గుర్తింపు ఉంది. విదేశాల్లో కూడా ధైర్యంగా పోరాడే జట్టును నిర్మించిన నాయకుడిగా గంగూలీని అభిమానులు ఇప్పటికీ గుర్తు చేసుకుంటారు. అలాంటి జీవితాన్ని సినిమాగా తీసుకురావడం వల్ల ఈ బయోపిక్‌పై సహజంగానే భారీ అంచనాలు ఏర్పడ్డాయి.

ప్రస్తుతం సోషల్ మీడియాలో కూడా జూలై 8పై చర్చ జోరుగా సాగుతోంది. ఫస్ట్ గ్లింప్స్ ఎలా ఉండబోతోంది? రాజ్‌కుమార్ రావు ‘దాదా’గా ఎంతవరకు మెప్పిస్తారు? విడుదల తేదీని కూడా అదే రోజు ప్రకటిస్తారా? అనే ప్రశ్నలు అభిమానుల్లో ఉత్కంఠను పెంచుతున్నాయి. అధికారిక ప్రకటన కోసం అందరూ ఆసక్తిగా ఎదురుచూస్తుండగా, గంగూలీ జీవితాన్ని వెండితెరపై ఎలా ఆవిష్కరిస్తారన్నది ఇప్పుడు అత్యంత ఆసక్తికర అంశంగా మారింది.