Salman Khan: సల్మాన్ ఖాన్ ‘SVC63’లో పవర్‌ఫుల్ విలన్..

బాలీవుడ్ సూపర్ స్టార్ సల్మాన్ ఖాన్ ప్రస్తుతం టాలీవుడ్ సెన్సేషనల్ డైరెక్టర్ వంశీ పైడిపల్లి దర్శకత్వంలో ఒక భారీ చిత్రంలో నటిస్తున్న విషయం తెలిసిందే. ‘SVC63’ అని పిలుస్తున్న ఈ ప్రాజెక్ట్ గురించి తాజాగా ఒక ఆసక్తికరమైన వార్త సోషల్ మీడియాలో వైరల్ అవుతోంది. ఈ సినిమాలో సల్మాన్ ఖాన్‌ను ఢీకొట్టే పవర్‌ఫుల్ విలన్ పాత్ర కోసం మేకర్స్ తీవ్రంగా అన్వేషిస్తున్నారు. తాజా సమాచారం ప్రకారం, మలయాళ స్టార్ నటుడు ఫహద్ ఫాసిల్ లేదా బాలీవుడ్ వెర్సటైల్ యాక్టర్ అక్షయ్ ఖన్నాలలో ఒకరిని ప్రతినాయకుడిగా ఎంపిక చేసే అవకాశం ఉందని తెలుస్తోంది. సల్మాన్ స్క్రీన్ ప్రెజెన్స్‌కు ఏమాత్రం తగ్గకుండా గట్టి పోటీ ఇచ్చే నటుడి కోసం చిత్ర బృందం ఈ పేర్లను పరిశీలిస్తోంది.

ప్రస్తుతం ఈ సినిమా షూటింగ్ ముంబైలో శరవేగంగా జరుగుతోంది. ఈ షెడ్యూల్‌లో లేడీ సూపర్ స్టార్ నయనతార కూడా జాయిన్ అవ్వడం విశేషం. ఇప్పటికే ఈ చిత్రంలో ఒక కీలక పాత్ర కోసం ప్రముఖ నటుడు అరవింద్ స్వామిని ఎంపిక చేయగా, రాజ్‌పాల్ యాదవ్ కూడా ఒక ముఖ్యమైన పాత్రలో కనిపిస్తున్నారు. స్టార్ ప్రొడ్యూసర్ దిల్ రాజు శ్రీ వెంకటేశ్వర క్రియేషన్స్ బ్యానర్‌పై అత్యంత భారీ బడ్జెట్‌తో ఈ యాక్షన్ ఎంటర్టైనర్‌ను నిర్మిస్తున్నారు. అన్ని కార్యక్రమాలను పూర్తి చేసి, 2027 ఈద్ కానుకగా ప్రపంచవ్యాప్తంగా సల్మాన్ ఖాన్ మార్కెట్‌కు తగ్గట్టుగా పాన్-ఇండియా స్థాయిలో ఈ చిత్రాన్ని విడుదల చేసేందుకు ప్లాన్ చేస్తున్నారు. భాయ్‌జాన్ ఫ్యాన్స్‌కు ఈ సినిమా ఒక అసలైన పండుగను తీసుకురాబోతోంది.