Salman Khan: బాలీవుడ్ స్టార్ హీరో సల్మాన్ ఖాన్ ఆరోగ్యంపై గత కొద్ది రోజులుగా సోషల్ మీడియాలో విస్తృతంగా ప్రచారం జరుగుతోంది. ఇటీవల ఆయన క్లీన్ షేవ్ లుక్లో, కొంత అలసటగా కనిపించిన వీడియోలు వైరల్ కావడంతో అభిమానులు ఆందోళన వ్యక్తం చేశారు. ఆసుపత్రి బయట కనిపించడం కూడా ఈ ఊహాగానాలకు మరింత బలం చేకూర్చింది. అయితే ఈ వార్తలపై ఇప్పటివరకు మౌనం పాటించిన సల్మాన్ ఖాన్ ఎట్టకేలకు స్పందించారు. అర్ధరాత్రి తన ఇన్స్టాగ్రామ్ ఖాతాలో వరుసగా బ్లాక్ అండ్ వైట్ ఫోటోలను షేర్ చేసిన సల్మాన్, పూర్తిగా స్టైలిష్ అవతార్లో కనిపించారు. ఒక ఫొటోలో కౌబాయ్ లుక్లో కనిపించిన ఆయన, 60 ఏళ్ల వయసులోనూ అదే స్వాగ్, అదే కాన్ఫిడెన్స్తో అభిమానులను ఆకట్టుకున్నారు. ఈ ఫోటోలతో పాటు “మీరందరూ ఎలా ఉన్నారు?” అనే చిన్న క్యాప్షన్ను కూడా జత చేశారు.
ఈ ఒక్క పోస్టునే అభిమానులు ఆయన ఆరోగ్యంపై వస్తున్న ప్రచారాలకు సమాధానంగా భావిస్తున్నారు. సోషల్ మీడియాలో వైరల్ అవుతున్న అనారోగ్య వార్తలను ఎక్కడా నేరుగా ప్రస్తావించకపోయినా, తన తాజా లుక్స్తో తాను బాగానే ఉన్నాననే సంకేతాన్ని సల్మాన్ ఇచ్చినట్లు అభిమానులు కామెంట్లు చేస్తున్నారు. ఆయన ఫోటోలు నిమిషాల్లోనే వైరల్ అవుతూ లక్షలాది లైక్లు, కామెంట్లను సొంతం చేసుకున్నాయి. ఇటీవల సల్మాన్ ఖాన్ ఆసుపత్రి బయట కనిపించిన సందర్భంలో ఆయన ఫోటోలు తీసేందుకు ప్రయత్నించిన పాపరాజీలపై అసంతృప్తి వ్యక్తం చేశారు. ఆ సంఘటన తర్వాత ఆయన ఆరోగ్యంపై అనేక ఊహాగానాలు సోషల్ మీడియాలో చక్కర్లు కొట్టాయి. అయితే తాజా ఇన్స్టాగ్రామ్ పోస్టుతో ఆ ప్రచారాలకు పరోక్షంగా తెరదించినట్లైంది.
ఇక సినిమాల విషయానికి వస్తే, సల్మాన్ ఖాన్ ప్రస్తుతం వరుస ప్రాజెక్టులతో బిజీగా ఉన్నారు. ఆయన నటిస్తున్న ‘మాతృభూమి’ చిత్రం విడుదల తేదీ ఇంకా ప్రకటించాల్సి ఉంది. మరోవైపు దర్శకుడు వంశీ పైడిపల్లి తెరకెక్కిస్తున్న యాక్షన్ థ్రిల్లర్లో కూడా సల్మాన్ ప్రధాన పాత్ర పోషిస్తున్నారు. ఈ చిత్రంలో ఆయనకు జోడీగా నయనతార నటిస్తున్నారు. ఈ రెండు సినిమాలపై అభిమానుల్లో ఇప్పటికే భారీ అంచనాలు ఉన్నాయి. తాజాగా వచ్చిన ఈ పోస్టుతో అభిమానులు ఊపిరి పీల్చుకోవడంతో పాటు, సల్మాన్ నుంచి త్వరలోనే మరిన్ని సినిమా అప్డేట్లు వస్తాయని ఆసక్తిగా ఎదురుచూస్తున్నారు.
Aap logon ki tabiyat kaisi hai ? pic.twitter.com/sFWklGKo8K
— Salman Khan (@BeingSalmanKhan) July 19, 2026