Ramba Urvashi Menaka: 14 ఏళ్ల తర్వాత ఫాంటసీ జానర్‌లోకి అల్లరి నరేష్ .. రిలీజ్ డేట్ ఫిక్స్

Ramba Urvashi Menaka: ఒకప్పుడు తన కామెడీ టైమింగ్‌తో తెలుగు ప్రేక్షకులను కడుపుబ్బా నవ్వించిన అల్లరి నరేష్, గత కొన్నేళ్లుగా విభిన్నమైన కథలను ఎంచుకుంటూ కొత్త ఇమేజ్‌ను సొంతం చేసుకున్నారు. కామెడీకి కాస్త దూరంగా వెళ్లి సీరియస్ పాత్రల్లోనూ తన ప్రతిభను నిరూపించుకున్న ఆయన, ఇప్పుడు మరోసారి తనకు బాగా కలిసొచ్చిన కామెడీ జానర్ వైపు అడుగులు వేస్తున్నారు. ఈరోజు తన పుట్టినరోజు సందర్భంగా తన 65వ సినిమా టైటిల్‌తో పాటు ఫస్ట్ లుక్ పోస్టర్, విడుదల తేదీని కూడా ప్రకటించారు. ‘రంబ ఊర్వశి మేనక’ అనే టైటిల్‌తో తెరకెక్కుతున్న ఈ చిత్రం, ఫాంటసీ కామెడీ ఎంటర్‌టైనర్‌గా ప్రేక్షకుల ముందుకు రానుండటం విశేషం. చంద్రమోహన్ చింతాడ దర్శకత్వంలో రూపొందుతున్న ఈ చిత్రాన్ని రాజేష్ దండా, నిమ్మకాయల ప్రసాద్ సంయుక్తంగా నిర్మిస్తున్నారు. ప్రముఖ నిర్మాణ సంస్థ అన్నపూర్ణ స్టూడియోస్, హాస్య మూవీస్ కలిసి నిర్మిస్తున్న తొలి చిత్రం ఇదే కావడం మరో ప్రత్యేకత. కామెడికి ఫాంటసీ ఎలిమెంట్స్ ను జోడిస్తూ రూపొందిస్తున్న ఈ సినిమా, అల్లరి నరేష్ కెరీర్‌లో మరో క్రేజీ మూవీగా నిలిచే అవకాశాలు కనిపిస్తున్నాయి. యముడికి మొగుడు తర్వాత దాదాపు 14 ఏళ్ల విరామం అనంతరం ఫాంటసీ జానర్‌లో ఆయన నటిస్తుండటంతో అభిమానుల్లో అంచనాలు మరింత పెరిగాయి.

చిత్రబృందం విడుదల చేసిన ఫస్ట్ లుక్ పోస్టర్ ఇప్పటికే సోషల్ మీడియాలో వైరల్ అవుతోంది. ‘కామెడీ గోస్ కాస్మిక్’ అనే ట్యాగ్‌లైన్‌కు తగ్గట్టుగా పోస్టర్‌ను డిజైన్ చేశారు. స్వర్గానికి వెళ్లే మెట్లపై అల్లరి నరేష్ సరదాగా కూర్చొని ఉండగా, ఆయన చేతిలో రంబ, ఊర్వశి, మేనక పేర్లు రాసిన తాళపత్రం కనిపించడం ఆసక్తిని కలిగిస్తోంది. మరోవైపు ఆకాశంలోని మేఘాల మధ్య అప్సరసలు తేలియాడుతున్న దృశ్యాలు సినిమా పూర్తిగా వినోదంతో పాటు ఫాంటసీ ప్రపంచంలోకి ప్రేక్షకులను తీసుకెళ్లబోతుందనే సంకేతాలను ఇస్తున్నాయి. టైటిల్, పోస్టర్ రెండూ కలిసి కథపై క్యూరియాసిటీని మరింత పెంచుతున్నాయి. ఈ చిత్రంలో వెన్నెల కిషోర్, నరేష్ వికె, శ్రీనివాస్ రెడ్డి, మురళీధర్ గౌడ్ కీలక పాత్రల్లో నటిస్తున్నారు. అల్లరి నరేష్ కామెడీ టైమింగ్ కి ఈ నటులు కలిస్తే రచ్చ నెక్స్ట్ లెవెల్ లో ఉంటుందని చెప్పడంలో సందేహం ఉండదు. ఇక ఈ సినిమాకు సంగీతాన్ని చైతన్ భరద్వాజ్ అందిస్తుండగా, ఎడిటర్‌గా చోటా కె ప్రసాద్ పనిచేస్తున్నారు. ప్రస్తుతం తెలుగు ప్రేక్షకులు కంటెంట్‌తో పాటు వినోదాన్ని అందించే చిత్రాలను ఎక్కువగా ఆదరిస్తున్నారు. అలాంటి సమయంలో కామెడీ, ఫాంటసీ, విజువల్ ఎంటర్‌టైన్‌మెంట్‌ను మేళవిస్తూ వస్తున్న ‘రంబ ఊర్వశి మేనక’పై మంచి బజ్ ఏర్పడుతోంది. 2026 సెప్టెంబర్ 4న ప్రపంచవ్యాప్తంగా థియేటర్లలో విడుదల కానున్న ఈ చిత్రం, అల్లరి నరేష్‌ను మరోసారి పూర్తి స్థాయి ఎంటర్‌టైనర్ హీరోగా నిలబెడుతుందా అనేది వేచి చూడాలి.