Project Hail Mary: బాక్సాఫీస్ సంచలనం: 10 రోజుల్లోనే 2500 కోట్లు

ప్రస్తుతం ప్రపంచవ్యాప్తంగా సినిమా లవర్స్ నోట వినిపిస్తున్న ఏకైక పేరు ‘ప్రాజెక్ట్ హెయిల్ మేరీ’. హాలీవుడ్ స్టార్ హీరో ర్యాన్ గాస్లింగ్ ప్రధాన పాత్రలో వచ్చిన ఈ సైన్స్ ఫిక్షన్ విజువల్ వండర్ బాక్సాఫీస్ వద్ద రికార్డులను తిరగరాస్తోంది. కేవలం పది రోజుల్లోనే అంతర్జాతీయ స్థాయిలో సుమారు రూ. 2500 కోట్ల మార్కును దాటి ట్రేడ్ వర్గాలను విస్మయానికి గురిచేస్తోంది.ఇండియాలో ప్రేక్షకులు కూడా ఈ స్పేస్ అడ్వెంచర్‌కు బ్రహ్మరథం పడుతున్నారు. మార్చి 26న విడుదలైన ఈ చిత్రం, కేవలం నాలుగు రోజుల లాంగ్ వీకెండ్‌లోనే ఇండియాలో ₹17.28 కోట్లు రాబట్టి సత్తా చాటింది. ప్రధాన నగరాల్లోని ఐమాక్స్ (IMAX), 4DX స్క్రీన్ల కోసం ప్రేక్షకులు ఎగబడుతున్నారు. డిమాండ్ ఎంతలా ఉందంటే, తెల్లవారుజామున 3:45 గంటలకే షోలు వేస్తున్నా నిమిషాల్లో టిక్కెట్లు హాట్ కేకుల్లా అమ్ముడైపోతున్నాయి.

గతంలో ఇండియాలో భారీ వసూళ్లు సాధించిన హాలీవుడ్ సైన్స్ ఫిక్షన్ చిత్రాల రికార్డులను ఈ సినిమా మట్టికరిపిస్తోంది. ప్రఖ్యాత ‘ఇంటర్‌స్టెల్లార్’ కంటే 53% ఎక్కువ వసూళ్లను సాధించింది.’డ్యూన్ 2’** తో పోలిస్తే 35%, ‘ది మార్షియన్’ కంటే ఏకంగా 89% ముందంజలో ఉంది. 2025లో వచ్చిన ‘అవతార్: ఫైర్ అండ్ యాష్’ తర్వాత ఇండియన్ బాక్సాఫీస్‌ను షేక్ చేస్తున్న విదేశీ చిత్రం ఇదే కావడం విశేషం. ఫిల్ లార్డ్, క్రిస్టోఫర్ మిల్లర్ దర్శకత్వం వహించిన ఈ చిత్రంలో రేల్యాండ్ గ్రేస్ అనే వ్యోమగామి పాత్రలో ర్యాన్ గాస్లింగ్ అద్భుతంగా నటించారు. తన గతాన్ని మర్చిపోయి, అంతరిక్ష నౌకలో ఒంటరిగా మేల్కొన్న ఒక వ్యోమగామి.. తన తెలివితేటలతో మానవాళిని ముంచుకొస్తున్న ముప్పు నుండి ఎలా రక్షించాడు అనే పాయింట్ ప్రేక్షకులను కట్టిపడేస్తోంది.