Alias Rukmini: నితిన్ కోసం రంగంలోకి దిగిన నాని.. ‘అలియాస్ రుక్మిణి’ షూటింగ్‌కు రెడీ!

Alias Rukmini: నేచురల్ స్టార్ నాని నిర్మాతగా, నితిన్ హీరోగా రూపొందుతున్న ‘అలియాస్ రుక్మిణి’ సినిమా ఇప్పుడు మరో కీలక దశలోకి అడుగుపెట్టింది. సినిమా ప్రకటనతోనే క్యూరియాసిటీ పెంచిన ఈ ప్రాజెక్ట్‌కు సంబంధించిన తాజా అప్‌డేట్ అభిమానుల్లో మరింత ఉత్సాహాన్ని పెంచుతోంది. ఈ సినిమాకు సంబంధించిన రెగ్యులర్ షూటింగ్ హైదరాబాద్ పరిసర ప్రాంతాలలో ఈ రోజు నుంచి జరగబోతున్నట్లు తెలుస్తోంది. ఈ సినిమాకు సంబంధించిన అధికారిక పూజా కార్యక్రమాలు ఇటీవలే 2026 ఆగస్టు 3న హైదరాబాద్‌లోనే అత్యంత ఘనంగా నిర్వహించారు. కథా నేపథ్యం ప్రకారం, సినిమాలోని అత్యధిక భాగాన్ని ఇండోర్ సన్నివేశాలను చిత్రీకరించడం కోసం హైదరాబాద్‌లోని ప్రముఖ స్టూడియోలలో ప్రత్యేకమైన సెట్స్ వేయడానికి చిత్ర యూనిట్ ప్రణాళికలు సిద్ధం చేసింది.

నాని సమర్పణలో, దీప్తి గంటా నిర్మిస్తున్న ఈ చిత్రానికి ‘దండోరా’ ఫేమ్ మురళీ కాంత్ దేవసోత్ దర్శకత్వం వహిస్తున్నారు. నితిన్ సరసన రుక్మిణి వసంత్ హీరోయిన్‌గా నటిస్తున్నట్లు తెలుస్తోంది. అయితే మేకర్స్ నుంచి ఆఫీషియల్ అనౌన్స్ వచ్చాక మాత్రమే ఆమె పాత్ర గురించి క్లారిటీ వచ్చే అవకాశం ఉంది. ఈ బోల్డ్ అండ్ ఎమోషనల్ రొమాంటిక్ డ్రామాకి ‘బేబి’ ఫేమ్ విజయ్ బుల్గానిన్ సంగీతాన్ని అందిస్తున్నారు. హైదరాబాద్ షెడ్యూల్స్ పూర్తి చేసిన తర్వాత కొన్ని ముఖ్యమైన పాటలు, అవుట్‌డోర్ సన్నివేశాల షూటింగ్ కోసం మాత్రమే చిత్ర యూనిట్ ఇతర ప్రాంతాలకు వెళ్లే అవకాశం ఉందని తెలుస్తోంది.

ఇక ఈ ప్రాజెక్ట్‌పై నాని కూడా ప్రత్యేక నమ్మకం పెట్టుకున్నట్లు సినీ వర్గాల్లో చర్చ జరుగుతోంది. కథ బలంగా ఉండటంతోనే ఈ సినిమాను నిర్మించేందుకు ముందుకొచ్చారని సమాచారం. నాని, నితిన్ కాంబో పై ఇప్పటికే మంచి అంచనాలు ఏర్పడ్డాయి. నాని నిర్మాతగా కొత్త కథలకు ప్రాధాన్యం ఇస్తున్న సమయంలో, నితిన్‌తో ఆయన చేస్తున్న ఈ సినిమా టాలీవుడ్‌లో ప్రత్యేక చర్చకు దారితీస్తోంది. షూటింగ్ ప్రారంభంతో ‘అలియాస్ రుక్మిణి’ ప్రచారం కూడా కొత్త దశలోకి వెళ్లే అవకాశం కనిపిస్తోంది. ఇక ఈ సినిమాను 2027 ప్రథమార్ధంలో రిలీజ్ చేసేందుకు సన్నాహాలు జరుగుతున్నాయి.