Unmadam OTT Release: మలయాళ సినిమాలంటేనే డిఫరెంట్ కథలు, ఊహించని ట్విస్టులు, సైకలాజికల్ థ్రిల్లర్లకు పెట్టింది పేరు. గత కొన్నేళ్లుగా కేరళ నుంచి వస్తున్న క్రైమ్ ఇన్వెస్టిగేషన్ సినిమాలు తెలుగు ఓటీటీ ప్రేక్షకులను కూడా బాగా ఆకట్టుకుంటున్నాయి. ఇప్పుడు అదే జాబితాలో చేరేందుకు సిద్ధమవుతోంది ‘ఉన్మాదం’ (Unmadham). ఈ ఇంటెన్స్ స్టోరీలో పోలీస్ కానిస్టేబుల్ పాత్రలో అద్భుతమైన నటనను కనబరిచారు మలయాళ స్టార్ హీరో కుంచాకో బోబన్. జై భీమ్ ఫేమ్ లిజోమోల్ జోస్ కథానాయికగా నటించిన ఈ చిత్రాన్ని టి-సిరీస్, పనోరమా స్టూడియోస్ సంయుక్తంగా నిర్మించాయి. థియేటర్లలో ఆసక్తికరమైన స్పందన తెచ్చుకున్న ఈ మలయాళ సైకలాజికల్ క్రైమ్ థ్రిల్లర్ త్వరలోనే తెలుగు సహా పలు భాషల్లో డిజిటల్ స్ట్రీమింగ్కు రానుంది.
సోనీలివ్ లో స్ట్రీమింగ్
జూలై 31న థియేటర్లలో విడుదలైన ‘ఉన్మాదం’ డిజిటల్ హక్కులను ప్రముఖ ఓటీటీ వేదిక సోనీలివ్ సొంతం చేసుకుంది. మలయాళంతో పాటు తెలుగు, తమిళం, కన్నడ, హిందీ భాషల్లో కూడా ఈ సినిమాను అందుబాటులోకి తీసుకురానున్నట్లు సంస్థ ప్రకటించింది. అయితే స్ట్రీమింగ్ తేదీని మాత్రం ఇంకా అధికారికంగా వెల్లడించలేదు. ఈ సినిమాకు కథ, స్క్రీన్ప్లే అందించిన షాహి కబీర్ ఇప్పటికే ‘జోసెఫ్’, ‘నాయట్టు’ వంటి ప్రశంసలు పొందిన చిత్రాలకు రచయితగా గుర్తింపు సంపాదించారు. పోలీస్ శాఖలో పనిచేసిన అనుభవాన్ని తన కథల్లో సహజంగా చూపించే ఆయన మరోసారి విభిన్నమైన కథను ప్రేక్షకుల ముందుకు తీసుకొచ్చారు. ఈ చిత్రానికి ప్రముఖ ఎడిటర్ కిరణ్ దాస్ దర్శకుడిగా వ్యవహరించడం మరో ప్రత్యేకత. దాదాపు 143 నిమిషాల నిడివి ఉన్న ఈ సినిమా సాధారణ పోలీస్ ఇన్వెస్టిగేషన్ కథలా కాకుండా, సైకలాజికల్ డ్రామాగా కూడా ప్రత్యేక గుర్తింపు తెచ్చుకుంది.
‘ఉన్మాదం’ కథ
ఈ స్టోరీ ఒక సాధారణ ఇన్వెస్టిగేషన్ లా మొదలై.. ఆ తర్వాత ఊహించని మైండ్ గేమ్ లా మారుతుంది. సినిమా రైటర్ అవ్వాలని కలలు కనే ఒక పోలీస్ ఆఫీసర్, క్లోజ్ అయిపోయిన ఒక పాత సూసైడ్ కేస్ని రీఓపెన్ చేస్తాడు. కానీ ఆ ఇన్వెస్టిగేషన్ లోతుల్లోకి వెళ్లేకొద్దీ, అది కేవలం ఆత్మహత్య కాదు.. దాని వెనుక ఒక సైకోపాత్ మైండ్ దాగి ఉందని అర్థమవుతుంది. ఆ మిస్టరీని చేధించే ప్రాసెస్ లో అతను చూసే నిజాలు అతనికి పిచ్చి లేపుతాయి.కేసు క్లైమాక్స్కి వచ్చేసరికి, శత్రువుల కంటే అతని సొంత బుర్రే అతనికి పెద్ద శత్రువులా మారుతుంది. ఒకవైపు ప్రాణాంతకమైన నేరస్థులు, మరోవైపు తనని మానసికంగా ముంచేస్తున్న భ్రమలు.. ఈ రెండింటి మధ్య నలిగిపోతూ అతను అల్లాడిపోతాడు. తనే ఒక ఉన్మాదిలా మారే పరిస్థితి వచ్చినా, చివరి నిమిషం వరకు పోరాడి ఆ చీకటి రహస్యాన్ని అతను ఎలా బయటపెట్టాడు అనేదే ఈ ఇంటెన్స్ సైకలాజికల్ థ్రిల్లర్.
ఇటీవలి కాలంలో సోనీలివ్ ప్రాంతీయ భాషల్లో విభిన్నమైన కథలకు ప్రాధాన్యం ఇస్తూ వరుసగా క్రైమ్, థ్రిల్లర్ సినిమాలను తీసుకువస్తోంది. ఇప్పుడు ‘ఉన్మాదం’ కూడా అదే జాబితాలో చేరనుండటంతో, సస్పెన్స్ సినిమాలను ఇష్టపడే తెలుగు ప్రేక్షకులు ఈ స్ట్రీమింగ్ కోసం ఆసక్తిగా ఎదురుచూస్తున్నారు.