Indraputra: హ్యాట్రిక్ హిట్ల తర్వాత ‘ఇంద్రపుత్ర’గా కిరణ్ అబ్బవరం.. పౌరాణిక ప్రపంచంలోకి గ్రాండ్ ఎంట్రీ!..

Indraputra: వరుస విజయాలతో ఫామ్‌లో ఉన్న యువ హీరో కిరణ్ అబ్బవరం ఇప్పుడు తన కెరీర్‌ను మరో స్థాయికి తీసుకెళ్లే ప్రయత్నం చేస్తున్నట్లే కనిపిస్తోంది. ఇప్పటివరకు విభిన్న జానర్లతో ప్రేక్షకులను ఆకట్టుకున్న ఆయన, ఇప్పుడు ఏకంగా భారీ పౌరాణిక ప్రపంచంలోకి అడుగుపెడుతున్నారు. అది కూడా పాన్ ఇండియా స్థాయిలో రూపొందనున్న భారీ మైథలాజికల్ యాక్షన్ ఫాంటసీ. ఈ రోజు ఈ ప్రాజెక్ట్ టైటిల్ కూడా ఆఫీషియల్ గా ప్రకటించడంతో కిరణ్ అభిమానుల్లో ఆసక్తి మరింత పెరిగింది. ప్రస్తుతం కిరణ్ అబ్బవరం ‘చెన్నై లవ్ స్టోరీ’ విజయాన్ని ఆస్వాదిస్తున్నారు. ఇటీవల ఆయన కెరీర్‌లో వరుస విజయాలు నమోదవుతున్నాయి. ‘కేఏ’, ‘కే ర్యాంప్’, ‘చెన్నై లవ్ స్టోరీ’ వంటి చిత్రాలతో హ్యాట్రిక్ విజయాలు అందుకున్న కిరణ్, ప్రతి సినిమాతో విభిన్నమైన జానర్‌ను ఎంచుకుంటూ ముందుకు సాగుతున్నారు. ఒకే తరహా కమర్షియల్ కథలకు పరిమితం కాకుండా కొత్త కథలతో ముందుకు సాగుతున్నారు.

ఇప్పుడు అదే ప్రయాణాన్ని మరో భారీ అడుగుతో కొనసాగిస్తున్నారు. ప్రేరణ అరోరా, జీ స్టూడియోస్‌తో కలిసి కిరణ్ అబ్బవరం నటిస్తున్న భారీ బడ్జెట్ పౌరాణిక చిత్రానికి ‘ఇంద్రపుత్ర’ అనే టైటిల్‌ను ఈ రోజు ఆఫీషియల్ గా అనౌన్స్ చేశారు. ఈ సినిమాతో శ్రీకాంత్ పుప్పాల దర్శకుడిగా పరిచయం అవుతున్నారు. గతంలో ‘కాంతార చాప్టర్ 1’ చిత్రానికి ఫస్ట్ అసిస్టెంట్ డైరెక్టర్‌గా పనిచేసిన అనుభవం కూడా శ్రీకాంత్‌కు ఉంది. ఇప్పుడు అదే ఎక్స్పీరియన్స్ తో ఆయన తొలిసారి భారీ పౌరాణిక కథను తెరపైకి తీసుకురాబోతున్నారు.‘ఇంద్రపుత్ర’ను కేవలం పౌరాణిక కథగా కాకుండా యాక్షన్, ఫాంటసీ, ఎమోషన్ కలిసిన భారీ పాన్ ఇండియా చిత్రంగా రూపొందిస్తున్నట్లు తెలుస్తోంది.  కిరణ్ అబ్బవరం కూడా ఈ సినిమాలో ఇప్పటివరకు కనిపించని కొత్త అవతార్‌లో కనిపించనున్నట్లు సమాచారం. యువ హీరోగా ఇప్పటివరకు చేసిన పాత్రలకు పూర్తిగా భిన్నంగా పౌరాణిక ఫాంటసీ  నేపథ్యంలోని పవర్ఫుల్ పాత్రను ఆయన పోషించనున్నట్లు తెలుస్తోంది.

ప్రస్తుతం ‘ఇంద్రపుత్ర’ ప్రీ ప్రొడక్షన్ దశలో ఉంది. అక్టోబర్‌లో సినిమా షూటింగ్ ప్రారంభించేందుకు చిత్రబృందం సన్నాహాలు చేస్తోంది. భారీ సెట్స్, పౌరాణిక ప్రపంచానికి సంబంధించిన విజువల్స్, యాక్షన్ సన్నివేశాల కోసం ముందుగానే ప్రణాళికలు సిద్ధం చేస్తున్నట్లు తెలుస్తోంది. ఈ ప్రాజెక్ట్‌కు సంబంధించిన మిగిలిన నటీనటులు, సాంకేతిక నిపుణుల వివరాలను మేకర్స్ త్వరలో వెల్లడించనున్నారు.  భారీ బడ్జెట్‌తో రూపొందుతున్నందున తెలుగు ప్రేక్షకులతో పాటు ఇతర భాషల మార్కెట్లను దృష్టిలో పెట్టుకుని పాన్ ఇండియా స్థాయిలో సినిమాను తీసుకెళ్లాలని మేకర్స్ భావిస్తున్నారు. ఈ సినిమాను 2027లో థియేటర్లలోకి తెచ్చేవిధంగా మేకర్స్ అడుగులు వేస్తున్నట్లు తెలుస్తోంది.

ఇక కిరణ్ అబ్బవరం చేతిలో ‘ఇంద్రపుత్ర’తో పాటు మరికొన్ని ఆసక్తికరమైన ప్రాజెక్టులు ఉన్నాయి. ఆయన నటించిన ‘KA13’ ప్రస్తుతం నిర్మాణ దశలో ఉండగా, సుకుమార్ రైటింగ్స్ బ్యానర్‌పై రూపొందుతున్న ‘KA14’ కూడా త్వరలో ప్రేక్షకుల ముందుకు రానుంది. ఒకవైపు థ్రిల్లర్లు, మరోవైపు ఎంటర్‌టైనర్లు, ఇప్పుడు పౌరాణిక యాక్షన్ ఫాంటసీతో కిరణ్ తన కెరీర్‌ను విభిన్న దారుల్లో తీసుకెళ్తున్నారు. వరుస విజయాల తర్వాత భారీ పౌరాణిక కథను ఎంచుకోవడం, కొత్త దర్శకుడికి అవకాశం ఇవ్వడం, పాన్ ఇండియా స్థాయిలో ప్రాజెక్ట్‌ను రూపొందించడం ఆసక్తికరంగా మారింది. అక్టోబర్‌లో షూటింగ్ మొదలైన తర్వాత ఈ పౌరాణిక ప్రపంచం ఎలా ఉండబోతోందనే విషయంపై మరింత స్పష్టత వచ్చే అవకాశం ఉంది.