Jai Hanuman: ప్రశాంత్ వర్మ ‘జై హనుమాన్’లో ధురంధర్ నటుడు..

కన్నడ స్టార్ రిషబ్ శెట్టి ప్రధాన పాత్రలో నటిస్తున్న భారీ తెలుగు చిత్రం ‘జై హనుమాన్’. దర్శకుడు ప్రశాంత్ వర్మ తెరకెక్కిస్తున్న ఈ ప్రతిష్టాత్మక డివోషనల్ యాక్షన్ డ్రామా షూటింగ్ ఇటీవలే ప్రారంభమైంది. ఈ క్రమంలో తాజాగా ఈ సినిమాలో ఒక కీలక పాత్ర కోసం బాలీవుడ్ సెన్సేషనల్ నటుడు అక్షయే ఖన్నాను ఎంపిక చేసినట్లు సమాచారం వినిపిస్తోంది. ‘ధురంధర్’ వంటి సినిమాలతో పవర్‌ఫుల్ పెర్ఫార్మెన్స్ ఇచ్చిన నటుడు ఈ ప్రాజెక్టులో చేరడం సినిమాకు మరింత బలాన్ని ఇస్తుందని విశ్లేషకులు భావిస్తున్నారు.

ప్రశాంత్ వర్మ ఇప్పటికే తన ‘ప్రశాంత్ వర్మ సినిమాటిక్ యూనివర్స్’ (PVCU)లో భాగంగా “మహాకాళీ” చిత్రాన్ని కూడా లైన్‌లో పెట్టారు. అక్షయే ఖన్నా ఈ యూనివర్స్‌లో కూడా నటిస్తున్నారని, ఆ లింక్‌తోనే ఆయన ‘జై హనుమాన్’లోకి ఎంటర్ అయ్యే అవకాశం ఉందని ఇండస్ట్రీ టాక్. ధురంధర్ చిత్రంలో అక్షయేకు లభించిన గుర్తింపు కారణంగా, ఆయన పాత్ర ఈ సినిమాలో చాలా పవర్‌ఫుల్‌గా ఉండబోతోందని తెలుస్తోంది. ఈ క్రేజీ అప్‌డేట్ ఇప్పుడు ఫ్యాన్స్‌లో సినిమాపై మరింత క్యూరియాసిటీని పెంచుతోంది. అయితే, ఈ వార్తలపై మరింత స్పష్టత రావాలంటే చిత్ర యూనిట్ నుంచి అధికారిక ప్రకటన వెలువడాల్సి ఉంది. రిషబ్ శెట్టి – ప్రశాంత్ వర్మ కలయికలో రాబోతున్న ఈ చిత్రం హనుమంతుడి కథను కొత్త కోణంలో ఆవిష్కరించబోతోందని సమాచారం.