Hema Malini Biopic: బాలీవుడ్లో కొన్ని పేర్లు తరాల మారినా తమ ప్రత్యేక స్థానాన్ని ఎప్పటికీ కోల్పోవు. అలాంటి అరుదైన నటీమణుల్లో హేమ మాలిని ఒకరు. ఆరు దశాబ్దాల సినీ ప్రయాణంలో ఎన్నో గుర్తుండిపోయే పాత్రలు పోషించి, కోట్లాది మంది అభిమానుల మనసుల్లో ‘డ్రీమ్ గర్ల్’గా నిలిచిపోయిన ఆమె ఇప్పుడు మరోసారి వార్తల్లో నిలిచారు. అయితే ఈసారి కారణం కొత్త సినిమా కాదు. తన బయోపిక్ వస్తే, అందులో తన పాత్రను ఎవరు పోషించాలనుకుంటున్నారనే ప్రశ్నకు ఆమె ఇచ్చిన సమాధానం ఇప్పుడు వైరల్ గా మారింది.
సినీ పరిశ్రమలో 60 ఏళ్ల విజయవంతమైన సినీ ప్రయాణాన్ని పూర్తి చేసుకున్న సందర్భంగా ముంబైలో నిర్వహించిన ‘డ్రీమ్ గర్ల్స్ డైమండ్ జూబ్లీ’ కార్యక్రమంలో హేమ మాలిని పాల్గొన్నారు. ఈ ప్రత్యేక వేడుకలో ఆమె కెరీర్కు సంబంధించిన ఎన్నో విషయాలు చర్చకు వచ్చాయి. అదే సమయంలో ఆమె జీవితంపై బయోపిక్ తీసే అవకాశం గురించి కూడా ప్రశ్న ఎదురైంది. ముఖ్యంగా, తన పాత్రను బాలీవుడ్ స్టార్ దీపికా పడుకోన్ పోషిస్తే ఎలా ఉంటుందనే ప్రశ్నకు హేమ మాలిని ఎంతో సానుకూలంగా స్పందించారు. దీపికా పడుకోన్ గురించి మాట్లాడుతూ, ఆమెకు ఆసక్తి ఉంటే తప్పకుండా చేయవచ్చు. దీపిక చాలా అందమైన, ప్రతిభావంతమైన నటి అని హేమ మాలిని వ్యాఖ్యానించారు. ఈ ఒక్క మాటతో తన పాత్రకు దీపికా సరైన ఎంపిక అని పరోక్షంగా వెల్లడించినట్టైంది. అయితే ప్రస్తుతం హేమ మాలిని జీవితంపై బయోపిక్ తెరకెక్కుతున్నట్లు ఎలాంటి అధికారిక సమాచారం లేదు. అలాగే ఈ వ్యాఖ్యలపై దీపికా పడుకోన్ కూడా ఇప్పటివరకు స్పందించలేదు.
హేమ మాలిని సినీ ప్రయాణం గురించి ప్రత్యేకంగా చెప్పాల్సిన అవసరం లేదు. ‘సీతా ఔర్ గీతా’, ‘షోలే’, ‘డ్రీమ్ గర్ల్’ వంటి ఎన్నో క్లాసిక్ చిత్రాలతో ఆమె భారతీయ సినీ చరిత్రలో చిరస్థాయిగా నిలిచిపోయారు. నటిగా మాత్రమే కాకుండా, రాజకీయాలలో కూడా ఆమె తనదైన ముద్ర వేశారు. అందుకే ఆమె జీవిత కథను బయోపిక్ రూపంలో చూడాలని అభిమానులు చాలా కాలంగా కోరుకుంటున్నారు. అలాంటి చిత్రం తెరకెక్కితే భారతీయ సినీ చరిత్రలో మరో ప్రతిష్ఠాత్మక ప్రాజెక్ట్గా నిలిచే అవకాశం ఉందని సినీ విశ్లేషకులు కూడా భావిస్తున్నారు. ఒకవేళ భవిష్యత్తులో ఆమె జీవితంపై బయోపిక్ తెరకెక్కితే, అందులో నిజంగానే దీపికా పడుకోన్ నటిస్తారా? అనే ప్రశ్న ఇప్పుడు బాలీవుడ్లో హాట్ టాపిక్గా మారింది. అధికారిక ప్రకటన ఏదీ లేకపోయినా, డ్రీమ్ గర్ల్ నోటి నుంచి వచ్చిన ఈ కోరిక మాత్రం అభిమానుల్లో కొత్త ఆశలను రేకెత్తిస్తోంది.