దశాబ్దాలు గడిచినా ఆ ట్యూన్ వినపడగానే కుర్రకారు స్టెప్పులు వేయాల్సిందే, అలాంటి ఒక సెన్సేషనల్ సాంగ్ ‘హవా హవా’. 1980వ దశకం చివరలో ఇండియాను ఓ ఊపు ఊపేసిన ఈ పాట వెనుక ఉన్న ఒక ఆసక్తికరమైన వార్త ఇప్పుడు నెట్టింట వైరల్ అవుతోంది. అదేంటంటే, ఈ పాట పాడిన గాయకుడు హసన్ జహంగీర్ కు ఇప్పుడు ఏకంగా 46 లక్షల రూపాయల పారితోషికం దక్కడం. 1987లో హసన్ జహంగీర్ ఆలపించిన ‘హవా హవా’ పాట ఒక ప్రభంజనం సృష్టించింది. ఆ రోజుల్లో ఏ ఫంక్షన్ జరిగినా, ఏ రేడియో స్టేషన్ ఆన్ చేసినా ఈ పాట మార్మోగిపోయేది. ఆ తర్వాత బాలీవుడ్ సినిమా ‘ధురంధర్’ లో సంజయ్ దత్ ఇంట్రడక్షన్ సీన్ కోసం ఈ పాటను బ్యాక్డ్రాప్గా వాడుకున్నారు. అప్పట్లో కాపీరైట్ చట్టాలు ఇప్పుడున్నంత పటిష్టంగా లేవు. అయినా సరే, ఆ పాట సృష్టించిన ఇంపాక్ట్ దృష్ట్యా చిత్ర యూనిట్ ఆయనకు క్రెడిట్ ఇవ్వడమే కాకుండా భారీ మొత్తాన్ని చెల్లించింది.
Also Read : SS Thaman: నాకు కాపీ కొట్టడం రాదు.. అందుకే దొరికిపోతా: థమన్
దాదాపు మూడు దశాబ్దాల క్రితం పాడిన పాటను గుర్తుపెట్టుకుని మరీ, దానికి ప్రతిఫలంగా 50 వేల డాలర్లు (భారత కరెన్సీలో సుమారు 46 లక్షల రూపాయలు) హసన్ జహంగీర్కు అందజేశారు. ఒక గాయకుడి ప్రతిభను గుర్తించి, కాపీరైట్ ఇబ్బందులు లేకపోయినా నైతికంగా ఇంత పెద్ద మొత్తాన్ని చెల్లించడం సంగీత పరిశ్రమలో ఒక గొప్ప విషయంగా చెప్పుకోవచ్చు. పాకిస్థానీ గాయకుడైన హసన్ జహంగీర్ ఈ ఒక్క పాటతోనే సరిహద్దులు దాటి అభిమానులను సంపాదించుకున్నారు. నేటి తరం రీమిక్స్ పాటల యుగంలో ఉన్నా, ఒరిజినల్ ‘హవా హవా’ పాట ఇచ్చే కిక్కు వేరనే చెప్పాలి. ఒక కళాకారుడి కష్టానికి దశాబ్దాల తర్వాత కూడా ఇలాంటి గుర్తింపు దక్కడం నిజంగా అభినందనీయం.