Dhanush: ఎన్టీఆర్, త్రివిక్రమ్ సినిమా తర్వాత మరో సంచలనం!.. అదే దేవుడిపై ధనుష్ కొత్త ప్రాజెక్ట్

Dhanush: దక్షిణాది సినీ పరిశ్రమలో పురాణ గాథలు, దైవ చరిత్రల ఆధారంగా సినిమాలు తెరకెక్కడం కొత్త విషయం కాదు. అయితే ఒకే దేవుడి నేపథ్యంతో ఒకేసారి ఇద్దరు స్టార్ హీరోలకు సంబంధించిన భారీ ప్రాజెక్టులు తెరపైకి రావడం మాత్రం ఇప్పుడు సినీ వర్గాల్లో ఆసక్తికరమైన చర్చకు దారితీసింది. ఇప్పటికే ఎన్టీఆర్, త్రివిక్రమ్ కాంబినేషన్‌లో మురుగన్ స్వామి ఆధారంగా ఒక ప్రతిష్టాత్మక చిత్రం రూపొందుతున్నట్లు వార్తలు వచ్చిన వేళ, ఇప్పుడు తమిళ స్టార్ హీరో ధనుష్ కూడా అదే మురుగన్ స్వామి నేపథ్యంతో కొత్త చిత్రాన్ని అధికారికంగా ప్రకటించడం ఆసక్తిగా మారింది. రెండు సినిమాల మధ్య ఎలాంటి పోలికలు ఉంటాయి? కథలు ఒకేలా ఉంటాయా? లేక పూర్తిగా భిన్నమైన కోణాలను ఆవిష్కరిస్తాయా? అనే ఆసక్తి ఇప్పుడు సోషల్ మీడియాలో విస్తృతంగా చర్చకు వస్తోంది.

గత కొన్ని రోజులుగా అభిమానులను ఊరిస్తూ వచ్చిన ధనుష్, ఎట్టకేలకు తన కొత్త చిత్రానికి సంబంధించిన ప్రకటన విడుదల చేశారు. ‘తమిళ్ మురుగన్’ అనే టైటిల్‌తో రూపొందనున్న ఈ చిత్రానికి ప్రముఖ దర్శకుడు వెట్రిమారన్ దర్శకత్వం వహించనున్నారు. ఇప్పటికే ఆడుకలం, అసురన్, విడుతలై వంటి సినిమాలతో ఈ ఇద్దరి కాంబినేషన్ ప్రేక్షకులను మెప్పించింది. ఇప్పుడు మరోసారి ఈ విజయవంతమైన జోడీ కలవడంతో సినిమాపై భారీ అంచనాలు నెలకొన్నాయి.

ఈ ప్రకటన మరో కారణంతో కూడా చర్చనీయాంశమైంది. ఇటీవల ఎన్టీఆర్, త్రివిక్రమ్ కాంబినేషన్‌లో మురుగన్ స్వామి ఆధారంగా సినిమా రూపొందనున్నట్లు వార్తలు రావడంతో తమిళనాడులో కొంతమంది అభిమానులు అభ్యంతరాలు వ్యక్తం చేశారు. మురుగన్ స్వామి తమిళ సంస్కృతితో ఎంతో బలమైన అనుబంధం కలిగిన దేవుడని, ఆ కథను తమిళ సినీ పరిశ్రమే చెప్పాలని కొందరు సోషల్ మీడియాలో అభిప్రాయపడ్డారు. ఈ నేపథ్యంలోనే ధనుష్ అదే దేవుడి నేపథ్యంతో సినిమా ప్రకటించడంతో ఆ చర్చ మరింత ఊపందుకుంది.

అయితే ప్రస్తుతం అందుబాటులో ఉన్న సమాచారం ప్రకారం ఈ రెండు సినిమాల కథాంశాలు పూర్తిగా భిన్నంగా ఉండే అవకాశాలే ఎక్కువగా కనిపిస్తున్నాయి. ఒకే దేవతా నేపథ్యం ఉన్నప్పటికీ కథ వేర్వేరుగా ఉండొచ్చని సినీ విశ్లేషకులు భావిస్తున్నారు. అందువల్ల రెండు చిత్రాలను నేరుగా పోల్చడం కంటే, అవి ఎలాంటి కంటెంట్ తో తెరకెక్కబోతున్నాయనే అంశమే ప్రేక్షకుల్లో ఎక్కువ ఆసక్తిని కలిగిస్తోంది.

ఇక ‘తమిళ్ మురుగన్’ చిత్రానికి యువ సంగీత దర్శకుడు సాయి అభ్యంక్కర్ సంగీతం అందించనున్నారు. ధనుష్ తన సొంత నిర్మాణ సంస్థ వండర్‌బార్ ఫిల్మ్స్ బ్యానర్‌పై ఈ చిత్రాన్ని నిర్మిస్తున్నారు. ప్రముఖ రచయిత అరివుమతి ఈ చిత్రానికి రచయితగా వ్యవహరించనున్నారు. కథకు సంబంధించిన పూర్తి వివరాలు, నటీనటులు, షూటింగ్ షెడ్యూల్ వంటి అంశాలను చిత్రబృందం ఇంకా ప్రకటించలేదు. ఇటీవల కాలంలో భారతీయ సినీ పరిశ్రమలో పురాణాలు, చారిత్రక కథలు, ఆధ్యాత్మిక అంశాలపై ఆధారపడిన చిత్రాలకు మంచి ఆదరణ లభిస్తోంది.  మరోవైపు ఎన్టీఆర్, త్రివిక్రమ్ ప్రాజెక్ట్‌తో పాటు ధనుష్ ‘తమిళ్ మురుగన్’ కూడా ఇప్పుడు దక్షిణాది సినీ పరిశ్రమలో అత్యంత ఆసక్తిగా ఎదురుచూస్తున్న ప్రాజెక్టుల జాబితాలో చేరిపోయింది.