72nd National Film Awards : 72వ జాతీయ అవార్డులపై విమర్శలు.. అద్భుతమైన సినిమాలకు నో అవార్డ్స్

జాతీయ చలనచిత్ర అవార్డుల ప్రకటన (72nd National Film Awards) తర్వాత సోషల్ మీడియా వేదికగా సినిమా అభిమానులు మరియు విమర్శకుల నుండి తీవ్ర అసంతృప్తి వ్యక్తమవుతోంది. ముఖ్యంగా సౌత్ సినిమాల విషయంలో జ్యూరీ తీసుకున్న కొన్ని నిర్ణయాలు సరికాదంటూ పెద్ద ఎత్తున చర్చ నడుస్తోంది. జాతీయ చలనచిత్ర అవార్డుల ప్రకటన ఎప్పుడూ ఏదో ఒక వివాదానికి లేదా విమర్శకు దారితీస్తూనే ఉంటుంది. ఈసారి కూడా సౌత్ సినీ ఇండస్ట్రీ నుండి అవార్డుల ఎంపికపై తీవ్ర స్థాయిలో నెటిజన్లు పెదవి విరుస్తున్నారు. అర్హత ఉన్న అద్భుతమైన చిత్రాలను పక్కన పెట్టి, కమర్షియల్ కోణంలో అవార్డులు పంచారనే ఆరోపణలు వస్తున్నాయి.

తమిళ పరిశ్రమ నుండి ధనుష్ దర్శకత్వంలో వచ్చిన ‘రాయన్’ చిత్రానికి బెస్ట్ రీజినల్ ఫిల్మ్ అవార్డును ప్రకటించారు. అయితే ఈ నిర్ణయంపై తమిళ సినీ ప్రియులు తీవ్ర అభ్యంతరం వ్యక్తం చేస్తున్నారు. గత ఏడాది కోలీవుడ్ నుండి క్లాసిక్ హిట్‌గా నిలిచిన కార్తీ, అరవింద్ స్వామిల ‘సత్యం సుందరం’ (మెయ్యళగన్), విజయ్ సేతుపతి నటనతో మైండ్ బ్లాక్ చేసిన 50వ చిత్రం ‘మహారాజా’, మరియు శివకార్తికేయన్ కెరీర్ బెస్ట్ పెర్ఫార్మెన్స్ ఇచ్చిన రియల్ లైఫ్ ఆర్మీ డ్రామా ‘అమరన్’ వంటి చిత్రాలకు బెస్ట్ ఫిల్మ్ అవార్డు వచ్చే పూర్తి అర్హత ఉందని విమర్శకులు వాదిస్తున్నారు. ‘అమరన్’ చిత్రానికి బెస్ట్ డైరెక్టర్ అవార్డు వచ్చినప్పటికీ, ఉత్తమ చిత్రంగా ‘రాయన్’ ఎంపిక కావడం చాలా మందికి ఆశ్చర్యాన్ని కలిగించింది.

మరోవైపు మలయాళ ఆడియెన్స్ నుండి విమర్శలు వస్తున్నాయి. నటుడు పృథ్వీరాజ్ సుకుమారన్ తన ప్రాణాలను పణంగా పెట్టి, శారీరకంగా ఎంతో కష్టపడి నటించిన అద్భుత దృశ్యకావ్యం ‘ఆడుజీవితం: ది గోట్ లైఫ్’. ఈ సినిమాకు ఖచ్చితంగా జాతీయ స్థాయిలో ‘బెస్ట్ ఫిల్మ్’ లేదా పృథ్వీరాజ్‌కు ‘బెస్ట్ యాక్టర్’ అవార్డు వరిస్తుందని ట్రేడ్ వర్గాలతో పాటు ప్రేక్షకులు బలంగా నమ్మారు. కానీ జ్యూరీ మాత్రం అనూహ్యంగా ‘ఫెమినిచ్చి ఫాతిమా’ అనే చిత్రానికి ఉత్తమ మలయాళ చిత్రంగా అవార్డును ప్రకటించింది. దీంతో అవార్డుల ఎంపిక పారదర్శకంగా జరగలేదని, నటనకు మరియు కష్టానికి ఇచ్చే గౌరవం ఇదేనా అంటూ సోషల్ మీడియాలో నెటిజన్లు జాతీయ అవార్డుల జ్యూరీపై విమర్శల కురిపిస్తున్నారు.