నటి త్రిష పుట్టినరోజు (మే 4) సందర్భంగా ‘విశ్వంభర’ చిత్ర బృందం ఆమెకు సోషల్ మీడియా వేదికగా జన్మదిన శుభాకాంక్షలు తెలిపింది. మెగాస్టార్ చిరంజీవి ప్రధాన పాత్రలో నటిస్తున్న ఈ భారీ బడ్జెట్ చిత్రంలో త్రిష కథానాయికగా నటిస్తోంది. ఈ సందర్భంగా చిత్ర నిర్మాణ సంస్థ యూవీ క్రియేషన్స్ త్రిషకు విషెస్ చెబుతూ సినిమాలో ఆమె పోషిస్తున్న పాత్ర పేరును కూడా వెల్లడించింది.
ఈ సినిమాలో త్రిష ‘అవని’ అనే పాత్రలో కనిపించబోతోంది. ఆమె నటన ఎంతో హుందాగా, మంత్రముగ్ధులను చేసే విధంగా ఉంటుందని చిత్ర బృందం పేర్కొంది. ‘బియాండ్ ది యూనివర్స్’ అనే ట్యాగ్లైన్తో వస్తున్న ఈ మెగా మాస్ చిత్రం త్వరలోనే థియేటర్లలోకి రాబోతున్నట్లు మేకర్స్ మరోసారి స్పష్టం చేశారు. దాదాపు దశాబ్ద కాలం తర్వాత చిరంజీవి, త్రిష జోడీ మళ్ళీ వెండితెరపై సందడి చేయనుండటంతో అభిమానుల్లో భారీ అంచనాలు నెలకొన్నాయి. వశిష్ట దర్శకత్వం వహిస్తున్న ఈ చిత్రానికి ఎం.ఎం. కీరవాణి సంగీతం అందిస్తున్నారు. విజువల్ వండర్గా తెరకెక్కుతున్న ఈ సినిమా ప్రస్తుతం చిత్రీకరణ దశలో ఉంది. తాజాగా విడుదల చేసిన బర్త్ డే పోస్ట్ సోషల్ మీడియాలో వైరల్ అవుతోంది.