Oh..! Sukumari Teaser: ఐశ్వర్య రాజేష్‌ను ముట్టుకుంటే షాక్ కొడుతుందా?.. ఆసక్తి రేకెత్తిస్తున్న ‘ఓ..! సుకుమారి’ టీజర్!

విభిన్నమైన కథలను ఎంచుకుంటూ తనకంటూ ఒక ప్రత్యేక గుర్తింపు తెచ్చుకున్న యువ హీరో తిరువీర్, విలక్షణ నటనకు కేరాఫ్ అడ్రస్‌గా నిలిచే **ఐశ్వర్య రాజేష్** జంటగా నటిస్తున్న తాజా చిత్రం ‘ఓ..! సుకుమారి’. పల్లెటూరి వాతావరణంలో సాగే రొమాంటిక్ కామెడీ ఎంటర్‌టైనర్‌గా తెరకెక్కుతున్న ఈ సినిమా ద్వారా భరత్ దర్శన్ దర్శకుడిగా ఇండస్ట్రీకి పరిచయం అవుతున్నారు. ఇప్పటికే ఈ సినిమా నుంచి విడుదలైన ఫస్ట్ లుక్ పోస్టర్లు సినిమాపై క్యూరియాసిటీని పెంచగా.. తాజాగా మేకర్స్ అత్యంత వినోదాత్మకంగా సాగే టీజర్‌ను విడుదల చేసి అంచనాలను మరింతగా పెంచేశారు.

టీజర్‌ను గమనిస్తే.. పల్లెటూరి నేపథ్యం, స్థానిక రాజకీయాలు, ఒక వింతైన సమస్య చుట్టూ ఈ కథ తిరుగుతుందని అర్థమవుతోంది. ఊళ్లో ఎప్పుడూ రాజకీయాల చుట్టూ తిరుగుతూ, ఎలాంటి బాదరబందీ లేని ఓ యువకుడు.. తనకు కాబోయే భార్య చాలా సున్నితమైన మనసున్న ‘సుకుమారి’ అయి ఉండాలని కలలు కంటూ ఉంటాడు. ఆ క్రమంలోనే అతనికి దామిని (ఐశ్వర్య రాజేష్) పరిచయం అవుతుంది. తొలిచూపులోనే ఆమెతో ప్రేమలో పడిన హీరో, వెంటనే పెళ్లి పనులు కూడా మొదలుపెట్టేస్తాడు. కానీ, అసలు ట్విస్ట్ ఏంటంటే.. ఆ అమ్మాయిని ఎవరు ముట్టుకున్నా కరెంట్ షాక్ కొడుతుంది! ఈ వింతైన సమస్య వల్ల ఆ కుర్రాడి జీవితంలో, ఊళ్లో ఎలాంటి హాస్యభరితమైన పరిస్థితులు తలెత్తాయనేది దర్శకుడు భరత్ దర్శన్ చాలా ఫన్నీగా చూపించినట్లు టీజర్ ద్వారా స్పష్టమవుతోంది. ఈ టీజర్ ప్రేక్షకుల్లో ఒక మంచి క్యూరియాసిటీని క్రియేట్ చేయడంతో పాటు కడుపుబ్బా నవ్విస్తోంది. తెలుగు, తమిళం, మలయాళం, కన్నడ భాషల్లో పాన్-సౌత్ చిత్రంగా ఈ మూవీ త్వరలో ప్రేక్షకుల ముందుకు రానుంది.