మరాఠా అన్సంగ్ వారియర్ కథను ‘ఛావా’ రూపంలో వెండితెరపై చూపిoచి భారీ విజయాన్ని అందుకున్న దర్శకుడు లక్ష్మణ్ ఉటేకర్. కొంత గ్యాప్ తీసుకుని మహారాష్ట్రకు చెందిన ప్రముఖ తమాషా, లావణి జానపద కళాకారిణి వితాబాయి భావ్ మాంగ్ నారాయణ గావ్కర్ జీవిత కథ ఆధారంగా ‘ఈట’ అనే సినిమాను తెరకెక్కిస్తున్నాడు. బాలీవుడ్ స్టార్ హీరోయిన్ శ్రద్ధా కపూర్ ఇందులో టైటిల్ రోల్ పోషిస్తుండగా.. ప్రతిష్టాత్మక నిర్మాణ సంస్థ మడాక్ ఫిల్మ్స్ ఈ చిత్రాన్ని నిర్మిస్తోంది.
తాజాగా ఈ సినిమా నుండి మేకర్స్ అఫీషియల్ టీజర్ను విడుదల చేశారు. ఈ టీజర్లో శ్రద్ధా కపూర్, వితాబాయి పాత్రలో పరకాయ ప్రవేశం చేసిందనే చెప్పాలి. వితాబాయి పాత్రకు పూర్తి న్యాయం చేయడం కోసం శ్రద్ధా కపూర్ ప్రత్యేకమైన శిక్షణ కూడా తీసుకున్నట్లు తెలుస్తోంది. జానపద కళాకారిణి జీవితంలోని అత్యంత భావోద్వేగమైన మరియు సాహసోపేతమైన ఘట్టాన్ని ఈ టీజర్ లో చూపించారు. తొమ్మిది నెలల గర్భిణిగా ఉండి కూడా వేదికపై ప్రదర్శన ఇవ్వడం, నొప్పులు ఎక్కువవ్వడంతో తెర వెనుక ప్రసవించి, బొడ్డు తాడును రాయితో కోసి.. వెంటనే మళ్లీ స్టేజ్ పైకి వచ్చి డ్యాన్స్ చేయడం వంటి దృశ్యాలు టీజర్లో అరాచకమైన రేంజ్లో ఉన్నాయి. ‘స్త్రీ 2’ వంటి బ్లాక్ బస్టర్ తర్వాత శ్రద్ధా కపూర్ సరైన కమర్షియల్ బ్రేక్ తీస్కొని ఒక రూటెడ్ కథతో ‘ఛావా’ దర్శకుడు లక్ష్మణ్ ఉటేకర్తో కొలాబరేట్ అవ్వడం సినిమాపై అంచనాలను భారీగా పెంచేసింది. ప్రస్తుతం ‘ఈట’ టీజర్ సోషల్ మీడియాలో విపరీతంగా ట్రెండ్ అవుతోంది. శ్రద్ధా కపూర్ నటన సూపర్బ్ అంటూ నెటిజన్లు ప్రశంసలు కురిపిస్తున్నారు. ఈ మోస్ట్ అవేటెడ్ బయోపిక్ డ్రామా రాబోయే ఆగస్టు 28న ప్రపంచవ్యాప్తంగా థియేటర్లలోకి రాబోతోంది. మరి ‘ఛావా’తో హిట్ కొట్టిన లక్ష్మణ్ ఉటేకర్, శ్రద్ధా కపూర్తో కలిసి ఈ అంచనాలను రీచ్ అవుతారో లేదో తెలియాలంటే ఆగస్టు వరకు వేచి చూడాల్సిందే.