హాలీవుడ్ స్టార్ జాఫర్ జాక్సన్ ప్రధాన పాత్రలో నటించిన మ్యూజికల్ బయోపిక్ ‘మైఖేల్’ భారత బాక్సాఫీస్ వద్ద అద్భుతమైన వసూళ్లతో దూసుకుపోతోంది. ఆంటోనీ ఫుక్వా దర్శకత్వంలో తెరకెక్కిన ఈ చిత్రం, విడుదలైన 10 రోజుల్లోనే భారత్లో మొత్తం రూ. 46.25 కోట్ల గ్రాస్ వసూళ్లను సాధించి సంచలనం సృష్టించింది. రెండో ఆదివారం నాడు ఈ సినిమా రూ. 5 కోట్లు రాబట్టింది. మొదటి ఆదివారంతో పోలిస్తే వసూళ్లలో 28 శాతం తగ్గుదల కనిపించినప్పటికీ, రెండో శనివారంతో పోలిస్తే కేవలం 5 శాతం మాత్రమే డ్రాప్ అవ్వడం ఈ సినిమా పట్ల ప్రేక్షకుల్లో ఉన్న ఆదరణను తెలియజేస్తోంది.
ఇప్పటికే ఈ చిత్రం భారత బాక్సాఫీస్ వద్ద ‘క్లీన్ హిట్’ జోన్లోకి ప్రవేశించింది. ఈ ఏడాది భారత్లో విజయవంతమైన మూడవ హాలీవుడ్ చిత్రంగా (ప్రాజెక్ట్ హెయిల్ మేరీ, లీ క్రోనిన్ ‘ది మమ్మీ’ తర్వాత) ఇది గుర్తింపు పొందింది. కేవలం ప్రివ్యూల ద్వారానే రూ. 1.70 కోట్లు వసూలు చేసిన ఈ సినిమా, వీకెండ్స్లో భారీ వసూళ్లను నమోదు చేస్తూ కొనసాగుతోంది. బాక్సాఫీస్ వద్ద ఉన్న పాజిటివ్ ట్రెండ్ ప్రకారం, ఈ చిత్రం రెండో మంగళవారం నాటికి రూ. 50 కోట్ల మార్కును సునాయాసంగా దాటే అవకాశం ఉంది.
ప్రస్తుత జోరును ఇలాగే కొనసాగిస్తే, ఈ బయోపిక్ తన లాంగ్ రన్లో రూ. 60 కోట్ల నుంచి రూ. 70 కోట్ల గ్రాస్ మార్కును చేరుకోవచ్చని విశ్లేషకులు అంచనా వేస్తున్నారు. మైఖేల్ జాక్సన్ జీవిత విశేషాలను కళ్లకు కట్టినట్లుగా చూపించడం.. జాఫర్ జాక్సన్ నటన ప్రేక్షకులను కట్టిపడేస్తుండటంతో, ఈ చిత్రం అన్ని వర్గాల నుండి ప్రశంసలు అందుకుంటోంది. ముఖ్యంగా మ్యూజికల్ ఎలిమెంట్స్ భారతీయ ప్రేక్షకులను థియేటర్లకు రప్పించడంలో కీలక పాత్ర పోషిస్తున్నాయి.