న్యూయార్క్, లాస్ ఏంజెల్స్ లో ‘మేరీ పుకార్ సునో’ బిల్ బోర్డ్స్!

జాతీయ అవార్డు గ్రహీత గుల్జార్, గ్రామీ అండ్ అకాడమీ అవార్డ్ విన్నర్ ఎ.ఆర్. రెహమాన్ కాంబినేషన్ లో విడుదలైంది యాంథమ్ ఆఫ్ హోప్ ‘మేరీ పుకార్ సునో’. సోనీ మ్యూజిక్ ఇండియా సంస్థ విడుదల చేసిన ఈ సింగిల్ ఆల్బమ్ లోని గీతాన్ని అల్కా యాజ్ఞిక్, శ్రియో ఘోషల్, కె.ఎస్. చిత్ర, సాధన సర్గమ్ తో పాటు అర్మాన్ మల్లిక్, సషా తృప్తి, ఆసీస్ కౌర్ గానం చేశారు. జూన్ 25న ఈ గీతం ఇలా విడుదలైందో లేదో అలా… ప్రపంచవ్యాప్తంగా ఉన్న సంగీత ప్రియులను అలరించింది. ఇద్దరు మ్యూజిక్ మాస్ట్రోస్ కలయికలో వచ్చిన ఈ గీతానికి ఏడుగురు గాయనీ గాయకులు గాత్రాన్ని అందించడం నిజంగా గొప్ప విషయం. ఇటు తూర్పు నుండి అటు పశ్చిమం వరకూ ఈ పాటకు కోట్లాది మంది అభిమానులు ఏర్పడిపోయారు.

విశేషం ఏమంటే… ఈ పాటకు సంబంధించిన బిల్ బోర్డ్స్ ఇప్పుడు న్యూయార్క్, లాస్ ఏంజెల్స్ లోనూ దర్శనం ఇస్తున్నాయి. అనేక దేశాలలో ట్రెండింగ్ అవుతున్న ఈ పాట శ్రోతలకు సరికొత్త ఆశలను కలిగించడంలో భాగస్వామిగా మారిపోయింది. చీకటి తర్వాత వెలుగు వస్తుందనే సందేశంతో కూడిన ఈ గీతం కష్టకాలం ఎంతో కాలం ఉండదనే నగ్న సత్యాన్ని కూడా తెలిపిందని పలువురు అంటున్నారు. ఈ కరోనా కష్టకాలంలో ప్రజలకు ఈ గీతం ద్వారా గుల్జార్, రెహమాన్ మంచి భరోసా ఇచ్చారనే చెప్పాలి.