Getup Srinu: “తొక్కలో ఇంటర్వ్యూ.. ఆపేయ్”.. మైక్ తీసి పారేసిన గెటప్ శ్రీను! అసలేం జరిగిందంటే..

Getup Srinu: ప్రముఖ నటుడు గెటప్ శ్రీను, జర్నలిస్ట్ జాఫర్ మధ్య జరిగిన మాటల యుద్ధం ఇప్పుడు సోషల్ మీడియాలో హాట్ టాపిక్ గా మారింది. ఒక వ్యక్తిగత ఇంటర్వ్యూలో భాగంగా కులం ప్రస్తావన రావడంతో ఇద్దరి మధ్య తీవ్ర వాగ్వాదం చోటుచేసుకుంది. దీంతో అసహనానికి లోనైన గెటప్ శ్రీను ఇంటర్వ్యూను మధ్యలోనే నిలిపివేసి అక్కడి నుంచి వెళ్ళిపోయారని సమాచారం. అసలు ఏం జరిగిందంటే.. మహదేవపట్నంలో జరిగిన ఈ ఇంటర్వ్యూ స్టార్టింగ్ సరదాగా సాగినా.. కొద్ది సేపటికే ఉద్రిక్తతకు దారితీసింది. ఒకానొక సందర్భంలో కులం ప్రస్తావన రావడంతో ఒక్కసారిగా వేడెక్కింది. శ్రీను ఏదో సందర్భంలో స్పందిస్తూ “మేము కాపులం” అని వ్యాఖ్యానించగా.. దానిపై జాఫర్ అభ్యంతరం వ్యక్తం చేసినట్లు తెలుస్తోంది. “అలా మాట్లాడకూడదు” అని జాఫర్ అనడంతో ఇద్దరి మధ్య మాటామాటా పెరిగింది.

పరిస్థితి విషమించడంతో తీవ్ర ఆగ్రహానికి గురైన గెటప్ శ్రీను.. “ఈ తొక్కలో ఇంటర్వ్యూ నేను చేయను” అంటూ మైక్ తీసి పక్కన పడేసి అక్కడి నుంచి వెళ్లిపోయారు. శ్రీను వెళ్ళిపోయిన తర్వాత కూడా జాఫర్ స్పందిస్తూ.. “నేను ఏం తప్పుగా అడిగాను? ఎందుకు అంత సీరియస్ అవుతున్నారు?” అని ప్రశ్నించడం అక్కడ ఉన్న వారిని ఆశ్చర్యానికి గురిచేసింది. అయితే అసలు వివాదానికి దారితీసిన ఆ ప్రశ్న ఏంటి? వారి మధ్య అంతలా ఘర్షణ వాతావరణం నెలకొనడానికి కారణమేమిటనే విషయాలపై ఇంకా స్పష్టత రావాల్సి ఉంది. ఈ ఇంటర్వ్యూకి సంబంధించిన పూర్తి వీడియో బయటకు వస్తేనే అసలు నిజాలు తెలిసే అవకాశం ఉంది. ప్రస్తుతం ఈ ఘటనకు సంబంధించిన చర్చ నెట్టింట వైరల్ అవుతోంది.