Genelia: “నా సమస్య కూడా సాల్వ్ చేయండి”.. బిగ్ బిని కోరిన జెనీలియా

బాలీవుడ్ మోస్ట్ క్యూట్ కపుల్‌గా పేరు తెచ్చుకున్న రితేష్ దేశ్‌ముఖ్, జెనీలియా డిసౌజా ఎక్కడ ఉన్నా తమ సందడితో అందరినీ అలరిస్తుంటారు. తాజాగా ఈ జంట బిగ్ బి అమితాబ్ బచ్చన్ నిర్వహిస్తున్న ‘కౌన్ బనేగా కరోడ్‌పతి’ (KBC) షోలో సందడి చేశారు. అయితే ఈ షోలో జెనీలియా తన భర్త రితేష్‌పై అమితాబ్ బచ్చన్‌కు ఒక ఆసక్తికరమైన ఫిర్యాదు చేయడం ఇప్పుడు సోషల్ మీడియాలో హాట్ టాపిక్‌గా మారింది.

ఈ ఎపిసోడ్‌లో జెనీలియా మాట్లాడుతూ.. ‘సర్, రితేష్ గురించి నాకో ఫిర్యాదు ఉంది. గతంలో దీపికా పదుకొణె ఇక్కడికి వచ్చినప్పుడు తన భర్త రణవీర్ సింగ్‌పై కంప్లైంట్ ఇస్తే మీరు దానిని పరిష్కరించారు. ఇప్పుడు నా సమస్యను కూడా మీరే తేల్చాలి’ అని సరదాగా కోరారు. తాము డేటింగ్ చేస్తున్న రోజుల్లో రితేష్ తనతో ఎలా ప్రవర్తించేవారో, పెళ్లి తర్వాత ఎలా మారిపోయారో అన్న కోణంలో జెనీలియా చేసిన వ్యాఖ్యలు ప్రేక్షకులకు విపరీతమైన నవ్వును తెప్పించాయి. అమితాబ్ బచ్చన్ తనదైన శైలిలో స్పందిస్తూ రితేష్‌ను ఆటపట్టించడం ఈ ఎపిసోడ్‌కే హైలైట్‌గా నిలిచింది. దీనికి సంబంధించిన ఒక చిన్న వీడియో క్లిప్ ప్రస్తుతం ఎక్స్ (ట్విట్టర్)లో తెగ వైరల్ అవుతోంది.

ఈ వీడియోలో రితేష్ తనను తాను సమర్థించుకోవడానికి ప్రయత్నిస్తుండగా, అమితాబ్ బచ్చన్, జెనీలియా కలిసి ఆయనపై కౌంటర్లు వేయడం కనిపిస్తుంది. రితేష్-జెనీలియా మధ్య ఉండే ఆ కెమిస్ట్రీని చూసి నెటిజన్లు ‘బెస్ట్ కపుల్’ అంటూ కామెంట్స్ చేస్తున్నారు. కేవలం ఆట మాత్రమే కాకుండా, సెలబ్రిటీల వ్యక్తిగత జీవితంలోని ఇలాంటి సరదా క్షణాలు కూడా ‘కౌన్ బనేగా కరోడ్‌పతి’ రేటింగ్‌ను అమాంతం పెంచేస్తున్నాయి.