Yatra: హీరోగా రజనీకాంత్ మనవడు.. కొడుకు సిల్వర్ స్క్రీన్ ఎంట్రీపై ధనుష్ క్లారిటీ ఇదే!

Yatra: భాషతో సంబంధం లేకుండా స్టార్ హీరోల వారసుల ఎంట్రీ కోసం అభిమానులు ఎంతో ఆసక్తిగా ఎదురుచూస్తుంటారు. తాజాగా కోలీవుడ్ స్టార్ ధనుష్ పెద్ద కొడుకు యాత్ర సినిమాల్లోకి ఎప్పుడు వస్తాడనే చర్చ నెట్టింట జోరుగా సాగుతోంది. ఇదే సమయంలో స్వయంగా ధనుష్ తన కొడుకుని హీరోగా పరిచయం చేయబోతున్నారంటూ గత కొన్ని రోజులుగా ప్రచారం కూడా జరుగుతుంది. ఈ తరుణంలో ధనుష్ తన కొడుకు సిల్వర్ స్క్రీన్ ఎంట్రీపై స్పష్టతనిచ్చారు.

తాజాగా నిర్వహించిన కర ప్రీ రిలీజ్ ఈవెంట్‌లో పాల్గొన్న ధనుష్‌ను తన కొడుకు సినిమా ఎంట్రీ గురించి ప్రశ్నించగా.. ఆయన ఆసక్తికర వ్యాఖ్యలు చేశారు. “మా కుటుంబ పరిస్థితుల దృష్ట్యా నేను కేవలం 16 ఏళ్ల వయసులోనే ఇండస్ట్రీలోకి అడుగుపెట్టాను. ఇప్పుడు యాత్ర వయసు 19 ఏళ్లు. అయినప్పటికీ తను నాకు ఇంకా చిన్న పిల్లోడిలాగే కనిపిస్తున్నాడు. భవిష్యత్తులో తను ఏమవుతాడో నాకింకా తెలియదు. సినిమాల్లోకి వస్తాడా? లేక మరో రంగంలోకి వెళ్తాడా? అనేది ఇప్పుడే చెప్పలేను” అని ధనుష్ పేర్కొన్నారు. నిజానికి యాత్రకు ఇప్పటికే సోషల్ మీడియాలో భారీ ఫాలోయింగ్ ఉంది. తన స్టైలిష్ లుక్స్‌తో తండ్రికి తగ్గ వారసుడు అనిపించుకుంటున్నాడు. అయితే ధనుష్ మాటలను బట్టి చూస్తుంటే, యాత్రను హీరోగా చూడటానికి అభిమానులు మరికొంత కాలం వేచి చూడక తప్పదనిపిస్తోంది. మరోవైపు ధనుష్ హీరోగా నటించిన లేటెస్ట్ మూవీ ‘కర’ రిలీజ్‌కు రెడీ అయ్యింది. విఘ్నేశ్ రాజా దర్శకత్వంలో తెరకెక్కిన ఈ పీరియాడికల్ యాక్షన్ థ్రిల్లర్ మూవీపై భారీ అంచనాలు ఉన్నాయి. ఈ చిత్రం ఈ నెల 30న తెలుగు, తమిళ భాషల్లో రిలీజ్ కానుంది.