Telugu Cinema: తెలుగు ఫిలిం ఇండస్ట్రీ ఎంప్లాయిస్ ఫెడరేషన్ ఎన్నికల్లో ప్రస్తుత అధ్యక్షులు అనిల్ కుమార్ వల్లభనేని ప్యానెల్ విజయాన్ని సాధించింది. 24 కార్మిక సంఘాల నాయకులు, కార్మికులు పాల్గొన్న ఈ ఎన్నికల్లో 2023-2025 సంవత్సరానికి గాను ఫెడరేషన్ అధ్యక్షుడిగా అనిల్ కుమార్ వల్లభనేని, సెక్రటరీ గా పీఎస్ఎన్ దొర ఏకగ్రీవంగా ఎంపికయ్యారు. కోశాధికారిగా పోటీ చేసిన సురేష్ 28 ఓట్ల మెజారిటీతో గెలుపొందారు.
ఈ సందర్భంగా తెలుగు ఫిలిం ఇండస్ట్రీ ఎంప్లాయిస్ ఫెడరేషన్ అధ్యక్షులు అనిల్ కుమార్ వల్లభనేని మాట్లాడుతూ, “మరోసారి మా ప్యానెల్ పై నమ్మకం ఉంచి ఘన విజయాన్ని అందించిన కార్మిక సోదర సోదరీమణులకు, 24 కార్మిక సంఘాల నాయకులకు, తోటి కౌన్సిల్ సభ్యులకు, మిత్రులకు, శ్రేయోభిలాషులకు ధన్యవాదాలు. సినిమా ఇండస్ట్రీ లో ఉన్న 25 వేల మంది సినిమా కార్మికుల కష్టనష్టాలు తెలిసిన నాయకులుగా మరొకమారు మమ్మల్ని కార్మికులు గుర్తించినందుకు సంతోషంగా ఉంది. ఫెడరేషన్ కు, సినిమా కార్మికులకు తగు న్యాయం చేసే విధంగా మా మీద ఉంచిన నమ్మకాన్ని వమ్ము చేయకుండా అందరిని కలుపుకొని ముందుకు సాగుతాం” అని తెలిపారు. ఈ గెలుపు 24 సంఘాల సినిమా కార్మికులదేనని, దీన్ని ఫెడరేషన్ మాజీ అధ్యక్షులు స్వర్గీయ కొమర వెంకటేష్, వికాస్ ( విక్కీ ) లకు అంకితం చేస్తున్నామని అన్నారు.