Kollywood : శంకర్ దర్శకత్వంలో అజిత్ కుమార్ సినిమా?

తమిళ స్టార్ దర్శకుల పేర్లలో శంకర్ ఒకప్పుడు అగ్రస్తానంలో ఉండేవారు. శంకర్ తో సినిమా చేసేందుకు స్టార్ హీరోలు ఎదురుచూసేవాళ్లు. కానీ అదంత గతం. స్నేహితుడు, భారతీయుడు 2, ఐ, గేమ్ ఛేంజర్ వంటి ప్లాప్స్ తో శంకర్ తో సినిమా చేసేందుకు భయపడుతున్నారు స్టార్ హీరోలు. కోలీవుడ్ స్టార్ హీరో అజిత్ కుమార్ మరియు సెన్సేషనల్ డైరెక్టర్ శంకర్ కాంబినేషన్‌లో ఒక భారీ చిత్రం రూపుదిద్దుకోనుందనే వార్త ప్రస్తుతం సినీ వర్గాల్లో హాట్ టాపిక్‌గా మారింది. ‘టూరింగ్ టాకీస్’ కథనం ప్రకారం, వీరిద్దరి కాంబోలో ఒక మైండ్ బ్లోయింగ్ ప్రాజెక్ట్ చర్చల దశలో ఉందని తెలుస్తోంది.

ప్రస్తుతం అజిత్ కుమార్ గుడ్ బ్యాడ్ అగ్లీ దర్శకుడు ఆధిక్ తో ‘డేర్ డెవిల్’ సినిమా ప్రకటించారు. ఈ సినిమాను స్వయంగా నిర్మిస్తున్నాడు. దాంతో పాటు ‘మంకాతా 2′ కూడా లైన్ లో ఉంది. ఈ రెండు చిత్రాల షూటింగ్ పూర్తయిన తర్వాతే శంకర్‌తో ప్రాజెక్ట్ పట్టాలెక్కే అవకాశం ఉంది. ఈ లోపు కథ, బడ్జెట్ మరియు ఇతర అంచనాలు సరిగ్గా కుదిరితే అధికారిక ప్రకటన వెలువడే అవకాశం ఉంది. దర్శకుడు శంకర్ గత చిత్రాలైన ‘ఇండియన్ 2’, ‘గేమ్ ఛేంజర్’ భారీ పరాజయంతో శంకర్ డ్రీమ్ ప్రాజెక్ట్ ‘వేల్ పారి‘ కథకు నిర్మాతలు భారీ బడ్జెట్ కేటాయించేందుకు ప్రస్తుతం కొంత వెనుకంజ వేస్తున్నట్లు సమాచారం. అందువల్ల ‘వేల్ పారి’ ని కాస్త పక్కన పెట్టి, అంతకంటే ముందే అజిత్‌తో ఒక రీజనబుల్ బడ్జెట్ ప్రాజెక్ట్‌ను పూర్తి చేయాలని శంకర్ భావిస్తున్నట్లు సినీ వర్గాలు పేర్కొంటున్నాయి.