Ginger Chutney: కొలతలతో నిల్వ ఉండే టిఫిన్ సెంటర్ అల్లం చట్నీ.. సింపుల్‌గా ఇలా చేసేయండి!
- Follow Us :
-
-
Add as a preferred
source on google
Ginger Chutney: టిఫిన్ సెంటర్లలో, పెద్ద పెద్ద రెస్టారెంట్లలో ఇడ్లీ, దోశల్లోకి ఇచ్చే ఎర్రటి అల్లం చట్నీ రుచి ఎలా ఉంటుందో తెలుసు కదా. చాలా అద్భుతంగా ఉండే ఆ అల్లం చట్నీని మీ ఇంట్లో తయారు చేసుకోవాలని అనుకుంటున్నారా. అయితే అదే రుచితో ఇంట్లోనే ఎక్కువ రోజులు నిల్వ ఉండేలా ఈ చట్నీని ఎలా తయారు చేసుకోవాలో ఈ స్పెషల్ స్టోరీలో తెలుసుకుందాం. హోటల్ స్టైల్ రుచి కోసం దాదాపు 15 రకాల దినుసులను పక్కా కొలతలతో ఉపయోగించి ఈ చట్నీని తయారుచేసే విధానం ఇదే.
కావలసిన పదార్థాలు – కొలతలు..
ఎండుమిర్చి: 65 గ్రాములు
అల్లం ముక్కలు: 100 గ్రాములు
బెల్లం: 300 గ్రాములు
శనగపప్పు: 50 గ్రాములు
మినప్పప్పు: 50 గ్రాములు
నువ్వులు: 25 గ్రాములు
ధనియాలు: 20 గ్రాములు
వెల్లుల్లి రేకులు: 15 గ్రాములు
చింతపండు: 30 గ్రాములు (అర గంట ముందు నానబెట్టుకోవాలి)
జీలకర్ర: 8 గ్రాములు
మెంతులు: 6 గ్రాములు
మిరియాలు: అర టేబుల్ స్పూన్
దాల్చిన చెక్క: చిన్న ముక్క
ఉప్పు: 40 గ్రాములు (రుచికి సరిపడా)
నూనె: 150 ml
కరివేపాకు, పసుపు: తగినంత
తయారీ విధానం ఇదే..
ముందుగా ఒక కడాయిలో నూనె వేసి వేడి చేయాలి. నూనె కాగాక శుభ్రం చేసి పెట్టుకున్న అల్లం ముక్కలను వేసి చిన్న మంటపై వేయించాలి. అల్లం వేగి మంచి సువాసన వస్తూ నూనెపై తేలేంత వరకు వేయించి పక్కన పెట్టుకోవాలి. అదే నూనెలో శనగపప్పు, మినప్పప్పు, ధనియాలు, మెంతులు, వెల్లుల్లి, దాల్చిన చెక్క, మిరియాలు వేసి రెండు నిమిషాలు మగ్గనివ్వాలి. తర్వాత జీలకర్ర, తెల్ల నువ్వులు, ఎండుమిర్చి, కరివేపాకు, కొద్దిగా పసుపు వేసి వేయించాలి. ఎండుమిర్చి మాడిపోకుండా ఉండేందుకు మంటను పూర్తిగా సిమ్‌లో ఉంచి, దోరగా వేగిన తర్వాత స్టవ్ ఆపేయాలి.
ఇలా వేయించుకున్న దినుసులన్నింటినీ గ్రైండర్ (లేదా మిక్సీ) లో వేసి, కొద్దిగా దొడ్డు ఉప్పు, తగినన్ని నీళ్లు (సుమారు 150 ml) పోసి గ్రైండ్ చేయాలి. చట్నీ నలుగుతున్న సమయంలోనే గింజలు తీసేసిన చింతపండు, బెల్లం ముక్కలను కూడా వేసి మెత్తగా రుబ్బుకోవాలి. చట్నీ పూర్తిగా మెత్తగా అయిన తర్వాత రుచి చూసుకుని అవసరమైతే మరికొంత ఉప్పును యాడ్ చేసుకోవచ్చు. ఈ కొలతలతో చేస్తే దాదాపు 1 కేజీ 400 గ్రాముల చట్నీ రెడీ అవుతుంది. మిక్సీ కంటే గ్రైండర్‌లో రుబ్బడం వల్ల హోటల్ స్టైల్ టెక్స్చర్, రుచి వస్తాయని, ఇది ఎక్కువ రోజులు నిల్వ ఉంటుందని చెబుతున్నారు. కుదిరితే మీ ఇంట్లో కూడా ఒక సారి ట్రై చేసి చూడండి.