Cleaning Hacks : వంటగదిలో కూరగాయల తొక్కలు, చేపలు, మాంసం వ్యర్థాలు కొద్ది గంటలకే కుళ్ళిపోయి తీవ్రమైన దుర్వాసనను పరుస్తాయి. ముఖ్యంగా వేసవిలో ఈ సమస్య మరింత ఎక్కువై బ్యాక్టీరియా, ఈగలు వేగంగా పెరుగుతాయి. మీ వంటగది సదా పరిశుభ్రంగా, దుర్వాసన లేకుండా ఉండాలంటే చెత్తను పారవేయడమే కాకుండా, డస్ట్బిన్ను కూడా సరిగ్గా శుభ్రం చేసుకోవడం తప్పనిసరి.
డస్ట్బిన్ క్లీనింగ్కు కావలసిన వస్తువులు
డస్ట్బిన్ తోమడానికి గోరువెచ్చని నీరు, డిష్ వాషింగ్ లిక్విడ్, బేకింగ్ సోడా, తెల్ల వెనిగర్, పొడవైన స్క్రబ్ బ్రష్, మైక్రోఫైబర్ క్లాత్ , చేతులకు గ్లోవ్స్ సిద్ధం చేసుకోండి.
పర్ఫెక్ట్ క్లీనింగ్ కోసం 6 సులువైన స్టెప్స్
చెత్తను ఖాళీ చేయడం: ముందుగా గ్లోవ్స్ వేసుకుని చెత్తను పూర్తిగా బయటకు తీసి, అడుగున అంటిపెట్టుకున్న వ్యర్థాలను పేపర్ టవల్తో శుభ్రం చేయాలి.
గోరువెచ్చని నీటితో వాషింగ్: డస్ట్బిన్ను లోపల, బయట గోరువెచ్చని నీటితో కడగడం వల్ల అంటిపెట్టుకున్న నూనె జిడ్డు, వ్యర్థాలు వదులుతాయి.
సబ్బు నీటితో రుద్దడం: బకెట్ నీటిలో డిష్ వాషింగ్ లిక్విడ్ కలిపి, పొడవైన బ్రష్ సహాయంతో డస్ట్బిన్ మూలలు, మూత, రబ్బరు అంచులు , హ్యాండిల్ను క్షుణ్ణంగా తోమాలి.
బేకింగ్ సోడా మ్యాజిక్: కడిగిన తర్వాత డస్ట్బిన్ తడిగా ఉన్నప్పుడే 2-3 స్పూన్ల బేకింగ్ సోడా, కొద్దిగా వెనిగర్ వేస్తే నురుగు వస్తుంది. దాన్ని 15 నిమిషాలు అలాగే ఉంచి, తర్వాత బ్రష్తో రుద్ది కడిగితే దుర్వాసన పూర్తిగా మాయమవుతుంది.
ఎండలో ఆరబెట్టడం: డస్ట్బిన్ను తలక్రిందులుగా పెట్టి ఎండలో లేదా గాలి తగిలే చోట బాగా ఆరనివ్వాలి. కొద్దిగా తేమ ఉన్నా మళ్లీ బూజు, వాసన వస్తాయి.
కొత్త చెత్త సంచి వాడకం: డస్ట్బిన్ ఆరిన తర్వాతే కొత్త కవర్ తొడగాలి. కవర్ అడుగున కొద్దిగా బేకింగ్ సోడా చల్లితే తడిని, దుర్వాసనను పీల్చుకుంటుంది.
దుర్వాసన రాకుండా ఉండేందుకు కొన్ని జాగ్రత్తలు
తడి చెత్తను రోజూ పారవేయడం, వారానికి ఒకసారి తేలికపాటి సబ్బు నీటితో తుడవడం, నెలకోసారి పైన పేర్కొన్న పద్ధతిలో డస్ట్బిన్ను పూర్తిగా కడగడం అలవాటు చేసుకోవాలి. చేపలు, మాంసం వ్యర్థాలను చిన్న ప్లాస్టిక్ కవర్లో విడిగా చుట్టి పడేయడం మంచిది. శాస్త్రీయ పరిశోధనల ప్రకారం, గృహ వాతావరణంలో ఎక్కువగా బ్యాక్టీరియా చేరే ప్రదేశాల్లో కిచెన్ డస్ట్బిన్ ఒకటి. కాబట్టి దీనిని క్రమం తప్పకుండా శుభ్రం చేసుకోవడం ద్వారా ఇంటి వాతావరణంతో పాటు కుటుంబ ఆరోగ్యాన్ని కూడా పరిరక్షించుకోవచ్చు.