Car Maintenance: ఇంటి ముందు లేదా గ్యారేజీలో రోజులు, వారాల తరబడి వాహనాలను ఆపి ఉంచితే వాటిని ఎలుకలు తమ ప్రధాన ఆశ్రయంగా మార్చుకుంటాయి. ఎలుకలు ఎల్లప్పుడూ సురక్షితంగా విశ్రాంతి తీసుకోవడానికి , గూడు కట్టుకోవడానికి వెచ్చని, చీకటి , రహస్యంగా ఉండే ప్రదేశాల కోసం వెతుకుతుంటాయి. ఈ క్రమంలో కార్ల ఇంజిన్ కంపార్ట్మెంట్ వాటికి అనుకూలమైన వాతావరణాన్ని అందిస్తుంది.
ఎలుకల వల్ల కలిగే తీవ్ర నష్టాలు
ఒకసారి కారు ఇంజిన్లోకి ప్రవేశించాక ఎలుకలు విద్యుత్ తీగలను, రబ్బరు పైపులను , ఇన్సులేషన్ను కొరకడం ద్వారా వాహనానికి తీవ్ర నష్టాన్ని కలిగిస్తాయి. కొన్నిసార్లు అవి సీట్లను కూడా కొరికి రంధ్రాలు చేస్తాయి. దీనివల్ల డాష్బోర్డ్పై హెచ్చరిక లైట్లు వెలగడం, సెన్సార్లు పనిచేయకపోవడం, ఇంజిన్ సమస్యలు రావడం , వేలల్లో ఖరీదైన మరమ్మతులు చేయాల్సి రావడం వంటివి జరుగుతాయి. అయితే కొన్ని చిన్నచిన్న జాగ్రత్తలు పాటించడం ద్వారా ఈ సమస్య నుంచి తప్పించుకోవచ్చు.
ఇంజిన్ భాగాలను ఎప్పటికప్పుడు శుభ్రంగా ఉంచుకోవాలి
మురికిగా ఉన్న ఇంజన్ కంపార్ట్మెంట్ ఎలుకలు దాక్కోవడానికి అనువుగా ఉంటుంది. బోనెట్ కింద పేరుకుపోయే ఎండిన ఆకులు, దుమ్ము, చెత్తాచెదారం ఎలుకలు వృద్ధి చెందడానికి ఆవాసంగా మారతాయి. కాబట్టి బోనెట్ తెరచి ఎండిన ఆకులను తొలగించడం, ఇంజన్ భాగాన్ని క్రమం తప్పకుండా శుభ్రం చేయడం , కారు లోపల ఆహార ప్యాకెట్లు, వ్యర్థాలను ఉంచకుండా జాగ్రత్తపడడం ఎంతో అవసరం.
పుదీనా నూనె , ఘాటైన పదార్థాల వాడకం
పుదీనా నూనె (Peppermint Oil) సహజ సిద్ధమైన నివారణగా పనిచేస్తుంది. దూది ఉండలపై కొన్ని చుక్కల పుదీనా నూనెను వేసి పార్కింగ్ స్థలం దగ్గర లేదా ఇంజిన్ కంపార్ట్మెంట్లో సురక్షితమైన ప్రదేశాల్లో ఉంచితే, ఆ ఘాటైన వాసనకు ఎలుకలు దూరంగా ఉంటాయి. అయితే ఈ దూది ఉండలను బాగా వేడిగా ఉండే ఇంజిన్ భాగాలపై నేరుగా ఉంచకూడదు. అదేవిధంగా టైర్ల దగ్గర, గ్యారేజ్ ప్రవేశ ద్వారం వద్ద కారం పొడి లేదా వెల్లుల్లి పొడి చల్లడం వల్ల కూడా వాటి వాసన గ్రహణ శక్తి దెబ్బతిని ఎలుకలు వాహనానికి దూరంగా పారిపోతాయి.
కారులో ఆహార పదార్థాలు ఉంచకూడదు
ఆగి ఉన్న వాహనాల్లోకి ఎలుకలు రావడానికి ఆహార వాసనలు ప్రధాన కారణం. కారు లోపల బిస్కెట్లు, స్నాక్స్, పండ్ల ముక్కలు లేదా పెంపుడు జంతువుల ఆహారాన్ని అస్సలు వదిలివేయకూడదు. ఒకవేళ ఆహారం కారు సీట్లపై లేదా మ్యాట్లపై ఒలికితే వెంటనే శుభ్రం చేయాలి.
పరిశుభ్రమైన ప్రదేశంలో పార్కింగ్ & క్రమం తప్పకుండా కారు వాడకం
కారును పార్క్ చేసే ప్రదేశం కూడా చాలా ముఖ్యం. చెత్త కుప్పల దగ్గర, పొదలు లేదా దట్టమైన చెట్ల కింద పార్క్ చేస్తే ఎలుకలు సులభంగా కారులోకి ప్రవేశిస్తాయి. కాబట్టి పార్కింగ్ ప్రాంతాన్ని శుభ్రంగా ఉంచుకోవాలి. అలాగే కారును ఎక్కువ రోజులు ఒకే చోట ఆపి ఉంచకుండా, ప్రతి రెండు మూడు రోజులకు ఒకసారి చిన్న డ్రైవ్ చేయడం మంచిది. ఇంజిన్ వేడి, శబ్దం, కంపనాల వల్ల ఎలుకలు కారులో నివాసం ఏర్పరుచుకోవడానికి భయపడతాయి.
ఎలుకలు చేరాయనడానికి ప్రాథమిక సంకేతాలు
ఇంజిన్ ప్రాంతంలో చిన్న నల్లటి రేణువుల రూపంలో ఎలుకల రెట్టలు కనిపించడం, వైర్లు , రబ్బరు గొట్టాలు కొరికినట్లు ఆనవాళ్లు ఉండడం ప్రధాన సంకేతం. అలాగే ఎయిర్ బ్లోవర్ బాక్స్ , మూలల్లో కాగితాలు, ఎండుటాకులు, గుడ్డ ముక్కలతో గూడు కట్టి ఉన్నా, బోనెట్ తెరిచినప్పుడు దుర్వాసన వచ్చినా లేదా డాష్బోర్డ్పై కారణం లేకుండా హెచ్చరిక లైట్లు వెలిగినా ఎలుకలు చేరినట్లు గుర్తించాలి.
ఎలుకలు వైర్లను ఎందుకు కొరుకుతాయి?
కేంబ్రిడ్జ్ యూనివర్శిటీ ప్రెస్ ప్రచురించిన అధ్యయనం ప్రకారం, ఎలుకలకు ముందు పళ్ళు నిరంతరం పెరుగుతూ ఉంటాయి. వాటిని అరగదీసుకోవడానికి గట్టి వస్తువులను కొరకడం వాటి సహజ అలవాటు. దీనివల్ల వాహనాల్లోని విద్యుత్ తీగలు, రబ్బరు పైపులను అవి ప్రధాన లక్ష్యంగా చేసుకుంటాయి. ఒకవేళ మీ కారులో ఎలుకల బెడద తీవ్రంగా ఉంటే లేదా ఎలక్ట్రికల్ వైరింగ్ దెబ్బతింటే వెంటనే అనుభవజ్ఞుడైన మెకానిక్తో తనిఖీ చేయించడం శ్రేయస్కరం.