Summer Kitchen Tips: వేసవిలో కిచెన్‌లో ఉండలేకపోతున్నారా..? ఈ చిట్కాలతో ఏసీ లేకుండానే మీ వంటగది కూల్‌గా మారిపోతుంది..

Summer Kitchen Tips: వేసవి కాలం మొదలైతే ఇంటి అంతా వేడెక్కిపోతుంది. అయితే ఇంట్లో అన్నిటికంటే ఎక్కువ వేడి ఉండే ప్రదేశం వంటగదే.. బయట ఎండ వేడి, లోపల గ్యాస్ స్టవ్ వేడి కలిసి కిచెన్‌ను తందూర్‌లా మార్చేస్తాయి. ఇలాంటి పరిస్థితుల్లో వంట చేయడం మహిళలకు చాలా కష్టంగా మారుతుంది. చెమటలు పట్టడం, అలసట రావడం, ఎక్కువసేపు నిలబడలేకపోవడం వంటి సమస్యలు ఎదురవుతాయి.. దీంతో, మహిళలు వంట గది అంటేనే భయపడాల్సిన పరిస్థితి..

చాలా ఇళ్లలో వంటగదిలో ఏసీ, కూలర్ లేదా పెద్ద ఫ్యాన్ ఏర్పాటు చేయడం సాధ్యం కాదు. అయితే, కొన్ని చిన్న మార్పులు, తెలివైన అలవాట్లు పాటిస్తే ఏసీ లేకుండానే కిచెన్‌ను చల్లగా ఉంచుకోవచ్చు. అలాంటి 6 సులభమైన చిట్కాలు మీ కోసం..

1. సరైన సమయంలో కిటికీలు తెరవండి, మూయండి: ఉదయం, సాయంత్రం సమయాల్లో కిచెన్ కిటికీలు తెరిచి ఉంచితే స్వచ్ఛమైన గాలి లోపలికి వస్తుంది. దీంతో వంటగది తాజాగా ఉంటుంది. కానీ మధ్యాహ్నం ఎండ తీవ్రంగా ఉన్నప్పుడు కిటికీలు మూసివేయడం మంచిది. అలా చేస్తే వేడి గాలి లోపలికి రాదు.

2. ఉదయాన్నే వంట పూర్తి చేయండి: వేసవిలో మధ్యాహ్నానికి కిచెన్ ఎక్కువగా వేడెక్కుతుంది. అందుకే వీలైతే ఉదయం సమయంలోనే వంట పూర్తి చేయడం మంచిది. దీంతో మండే వేడిలో వంట చేయాల్సిన అవసరం ఉండదు.

3. వంటగదిని శుభ్రంగా ఉంచండి: కిచెన్‌లో అవసరం లేని వస్తువులు ఎక్కువగా ఉంటే వేడి అక్కడే నిలిచిపోతుంది. కాబట్టి ప్రతిరోజూ వంటగదిని శుభ్రం చేయాలి. అవసరమైన వస్తువులే ఉంచితే కిచెన్ విశాలంగా, చల్లగా అనిపిస్తుంది.

4. ఒకే పాత్రలో వంట చేయండి: పదేపదే గ్యాస్ స్టవ్ వెలిగించడం వల్ల వేడి మరింత పెరుగుతుంది. అందుకే వేసవిలో ఒకే పాత్రలో తయారయ్యే వంటకాలు చేయడం మంచిది. దీంతో గ్యాస్ కూడా తక్కువ ఖర్చవుతుంది, కిచెన్ వేడి కూడా తగ్గుతుంది.

5. తడి గుడ్డ వేలాడదీయండి: కిటికీ లేదా తలుపు దగ్గర కొద్దిగా తడి గుడ్డ వేలాడదీస్తే గాలి లోపలికి వచ్చేటప్పుడు చల్లగా మారుతుంది. ఇది సహజమైన, సులభమైన పద్ధతి.

6. మొక్కలు, లేత రంగులు ఉపయోగించండి: కిచెన్ కిటికీ దగ్గర చిన్న మొక్కలు ఉంచితే తాజాదనం ఉంటుంది. అలాగే లేత రంగు కర్టెన్లు లేదా బ్లైండ్లు ఉపయోగిస్తే సూర్యకిరణాల వేడి తక్కువగా ఉంటుంది.

మొత్తంగా వేసవిలో వంటగదిలో ఎక్కువసేపు ఉండడం ఇబ్బందికరమే. కానీ ఈ చిన్న చిన్న చిట్కాలు పాటిస్తే ఏసీ, కూలర్ అవసరం లేకుండానే కిచెన్‌ను చల్లగా, సౌకర్యంగా మార్చుకోవచ్చు. దీంతో వంట పని కూడా సులభంగా.. మరింత దృష్టిసారించి పూర్తి చేసుకోవచ్చు..