Soft Pink Lips Tips: మీ పెదాలు మృదువుగా.. గులాబీ రంగులో మెరిసిపోయే చిట్కాలు ఇవే..

Soft Pink Lips Tips: వేసవి కాలంలో పెదాలు పొడిబారడం, పగలడం, సహజ కాంతి కోల్పోవడం వంటి సమస్యలు చాలామందిని వేధిస్తుంటాయి. చాలామంది ఈ సమస్యలు చలికాలంలోనే వస్తాయని భావిస్తారు. కానీ, వేసవిలోని వేడి గాలులు, తీవ్రమైన ఎండ, హానికరమైన UV కిరణాలు కూడా పెదవులకు నష్టం కలిగిస్తాయి. ముఖంలోని ఇతర భాగాలతో పోలిస్తే పెదాలపై చర్మం చాలా పలుచగా ఉండటం వల్ల తేమ త్వరగా కోల్పోతుంది. దీంతో పెదాలు నల్లగా, నిర్జీవంగా కనిపించవచ్చు.

అయితే కొన్ని సులభమైన అలవాట్లు, ఇంటి చిట్కాలు పాటిస్తే పెదాలను మృదువుగా, గులాబీ రంగులో ఉంచుకోవచ్చు. ఖరీదైన బ్యూటీ ఉత్పత్తుల అవసరం లేకుండానే సహజమైన అందాన్ని పొందవచ్చు.

పుష్కలంగా నీరు త్రాగండి: డీహైడ్రేషన్ వల్ల పెదాలు త్వరగా పొడిబారిపోతాయి. అందుకే రోజుకు కనీసం 8 నుంచి 10 గ్లాసుల నీరు త్రాగడం అలవాటు చేసుకోవాలి. శరీరంలో తేమ సరిపడగా ఉంటే పెదాలు కూడా మృదువుగా కనిపిస్తాయి.

పెదాలకు స్క్రబ్ చేయండి: పంచదారలో కొద్దిగా తేనె కలిపి వారానికి రెండు సార్లు పెదవులపై సున్నితంగా రుద్దాలి. దీంతో చనిపోయిన చర్మం తొలగి పెదాలు నిగారింపుతో మెరిసిపోతాయి.

SPF ఉన్న లిప్ బామ్ వాడండి: ఎండలో బయటకు వెళ్లే ముందు SPF ఉన్న లిప్ బామ్ రాయడం మంచిది. ఇది సూర్యరశ్మి వల్ల పెదాలు నల్లబడకుండా కాపాడుతుంది.

బొడ్డుకు నూనె రాయండి: ఆయుర్వేదం ప్రకారం రాత్రి పడుకునే ముందు బొడ్డులో కొద్దిగా ఆవాల నూనె లేదా బాదం నూనె వేయడం వల్ల శరీరానికి తేమ అంది పెదాల ఆరోగ్యానికి కూడా మేలు జరుగుతుందని చెబుతారు.

దోసకాయ రసం ఉపయోగించండి: దోసకాయ రసాన్ని పెదవులకు రాస్తే నల్లదనం తగ్గడమే కాకుండా చల్లదనాన్ని కూడా ఇస్తుంది. వేసవిలో ఇది మంచి సహజ చికిత్సగా పనిచేస్తుంది.

పెదాలను పదేపదే తడపకండి: చాలామందికి పెదాలను నాలుకతో తడపడం అలవాటు ఉంటుంది. కానీ, లాలాజలంలోని ఎంజైమ్‌లు పెదాలను మరింత పొడిబారేలా చేస్తాయి. కాబట్టి ఈ అలవాటును వెంటనే మానుకోవాలి. మొత్తంగా ఈ చిన్న చిట్కాలు పాటిస్తే వేసవిలో కూడా మీ పెదాలు మృదువుగా, గులాబీ రంగులో ఆరోగ్యంగా మెరిసిపోతాయి.