Harmful Beauty Products: మహిళలు, పురుషులు ఇలా ఎవరైనా సరే.. తాను అందంగా కనపించడానికి ఎన్నో రకాలుగా జాగ్రత్తలు తీసుకుంటారు.. అయితే, మనం రోజువారీ వాడే కొన్ని ఉత్పత్తులు చర్మానికి, జుట్టుకు మేలు చేయకపోగా.. దీర్ఘకాలంలో తీవ్ర నష్టాన్ని కలిగిస్తాయని హెచ్చరిస్తున్నారు నిపుణులు.. బెంగళూరులోని సీనియర్ డెర్మటాలజిస్ట్ సూచనల ప్రకారం, మనం దూరంగా ఉండాల్సిన ఆ 5 ఉత్పత్తులు మరియు వాటికి ప్రత్యామ్నాయాలు ఏంటి అనేది ఓసారి పరిశీలిద్దాం..
1. ప్లాస్టిక్ దువ్వెనలు: ప్లాస్టిక్ దువ్వెనలను వాడటం వల్ల జుట్టులో స్థిర విద్యుత్ (Static Electricity) ఏర్పడుతుంది. దీనివల్ల జుట్టు పొడిగా మారి, త్వరగా విరిగిపోయే ప్రమాదం ఉంది. వీటి పదునైన అంచులు తల చర్మంపై (Scalp) చికాకు కలిగిస్తాయి.
– ప్రత్యామ్నాయం: వెడల్పు దంతాలు కలిగిన చెక్క దువ్వెన లేదా కార్బన్ దువ్వెనను వాడటం ఉత్తమం.
2. నోస్ స్ట్రిప్స్ (Nose Strips): ముక్కుపై ఉండే బ్లాక్ హెడ్స్ తొలగించడానికి చాలామంది నోస్ స్ట్రిప్స్ వాడుతుంటారు. ఇవి బ్లాక్ హెడ్స్తో పాటు చర్మంలో ఉండే సహజ సిద్ధమైన నూనెలను కూడా తొలగిస్తాయి. దీనివల్ల చర్మం దెబ్బతింటుంది.
– ప్రత్యామ్నాయం: సాలిసిలిక్ యాసిడ్ కలిగిన ఫేస్ వాష్ లేదా క్లే మాస్క్ (Clay Mask) వాడటం మంచిది.
3. మేకప్ వైప్స్ (Makeup Wipes): మేకప్ తొలగించడానికి వైప్స్ వాడటం సులభంగా అనిపించవచ్చు. కానీ వీటిలో ఉండే ఆల్కహాల్ మరియు కృత్రిమ సువాసనలు చర్మాన్ని పొడిబార్చి చికాకు కలిగిస్తాయి. ఇవి చర్మ రంధ్రాలను లోతుగా శుభ్రం చేయలేవు.
– ప్రత్యామ్నాయం: మైకెల్లార్ వాటర్ (Micellar Water) లేదా డబుల్ క్లెన్సింగ్ పద్ధతిని అనుసరించండి.
4. లూఫా (Loofah): స్నానానికి వాడే లూఫా బ్యాక్టీరియాకు నిలయంగా మారుతుంది. తడి లూఫాలో చనిపోయిన చర్మ కణాలు పేరుకుపోయి ఇన్ఫెక్షన్లు మరియు మొటిమలకు కారణమవుతాయి. ఇది చర్మంపై ఉండే సున్నితమైన పొరను కూడా దెబ్బతీస్తుంది.
– ప్రత్యామ్నాయం: మృదువైన కాటన్ టవల్ లేదా కెమికల్ ఎక్స్ఫోలియేటర్లను వాడండి.
5. హెయిర్ ఫాల్ కంట్రోల్ షాంపూలు: జుట్టు రాలడాన్ని అడ్డుకుంటాయని ప్రచారం చేసే అనేక షాంపూలలో కఠినమైన రసాయనాలు ఉంటాయి. ఇవి దీర్ఘకాలంలో జుట్టు నాణ్యతను దెబ్బతీస్తాయి.
– ప్రత్యామ్నాయం: సల్ఫేట్ లేని (Sulfate-free) తేలికపాటి షాంపూలను ఎంచుకోండి. అలాగే పోషకాహారం మరియు సరైన జీవనశైలిపై దృష్టి పెట్టండి.
